Iá, taǵdyrdyń tasy túsip, arbaǵa tańylsa da, sanasynyń oıaýlyǵymen, júreginiń jaýyngerligimen aýyrtpalyqqa moıymaı, alǵa umtylǵan jandar óz aramyzda da bar. Olar eshteńege qaramastan, talantymen, qarapaıym eńbegimen qoǵamymyzdyń damýyna úles qosyp júr.
«Nege, nege men?! O, Qudaıym, eshkimniń ala jibin attamap edim ǵoı...» degen zapyran dámdi ah urǵan ókinishpen oıandy ol toǵyz kúnge sozylǵan komadan. 26 jastaǵy jigit jumys ornynda óndiristik jaraqat alǵan edi. Burǵylaý mekemesinde burǵyshynyń kómekshisi bolyp eńbek etetin ol kúndegishe joǵaryda rotorda óz mindetin atqaryp jatty. Biraq bul kúni jańbyr sirkirep jaýyp turǵan. Sodan ba, qaıdam, konýsty turbany arnaıy qurylǵymen tartqanda basy taıqyp ketip, 9 metrlik aýyr turba Berekettiń ıyǵyna túsedi. Nátıjesinde julyny janshylyp, keýde omyrtqasy synyp, denesiniń tómengi bóligi jansyzdanǵan.
– Bul oqıǵa 2010 jyly 1 mamyrda boldy. Bul kezde men Aqtaýda eńbek etetinmin. Sodan keıin aıaǵymnan tura almaı qaldym. Dáriger anam bar, jan-jaqtan konsılıýmge kelgen hırýrgter bar, aqyldasa kele Germanııada nemese Qytaıda ota jasatýǵa keńes berildi. Men Úrimjige baryp, ota jasattym. Ondaǵylar julyn janshylyp qalǵanyn, ony Beıjińge baryp, dińgek jasýshasy arqyly qalpyna keltirý qajettigin aıtty. Sodan bir-eki jyldan soń arbaǵa otyratyn boldym. Qarǵa adym jer muń bolǵan men úshin munyń ózi úlken qýanysh boldy, – deıdi jylyoılyq Bereket Aqjigitov.
Mundaı jaǵdaı basyma túsedi-aý degendi óńi túgili túsinde de kórmegen Bereket moıymady. Qulazýǵa boıyn aldyrmaı, kókirek kózin ashyq ustaǵandiki me, ol Qytaıda emdelip júrip-aq jańa ónerge úırendi.
– Qytaıda qalpyna keltirý ortalyǵynda áldeneni toqyp otyrǵan áıelderdi kórdim. Qyzyǵýshylyǵym oıanyp: «Mynalar ne istep otyr?» – deımin janymdaǵy adamǵa. Ol: «Keste ǵoı, sizderde mundaı joq pa edi?» – deıdi. Qyzdar keste tikpese, buryn mundaıǵa mán bermeımiz ǵoı, – dep ómiriniń jańa paraǵyn ashqan ónerdi qalaı úırengeni týraly áńgimesin bastady ol. – Álgi áıel «Toqyp kóresiń be?» dep qolyndaǵy matasy men ınesin usynyp, kestelep sýret salý ónerin úıretti. Basynda aq mataǵa toqydym, keıin Qytaıdan arnaıy sýrettiń orny syzylǵan matalardy ákeldim.
Sóıtip Bereket asa tózimdilikti qajet etetin kestelep sýret salý ónerine yqylaspen den qoıdy. Atyraý munaı jáne gaz ýnıversıtetine grantpen oqýǵa túsken ol óndiristik syzbalardy sheber jasaıtyn. Sodan ba qolónerdi erkin meńgerip ketti.
Bir kartınany jasaý úshin ádette bir aıdaı ýaqyt ketse, onyń eń uzaq jasaǵan sýreti baqandaı tórt aıǵa sozylǵan eken. Bir jylda on shaqty kartınany aıaqtaıdy. Ol úshin Bereket kúnine 7-8 saǵat ınemen qudyq qazǵandaı jumys ústinde otyrady. Peızajdy, natıýrmortty, janýarlar men áıel sulýlyǵyn beınelegendi unatatyn talanttyń qolynan osy ýaqytqa deıin kestelengen, tas-monshaqpen kómkerilgen seksen shaqty kartına týǵan eken.
Alaıda kóziniń maıyn tamyzyp jasaǵan jumystary úıde eleýsiz ár jerde jatatyn, biraq bir kúni onyń kartınalary sol kezdegi aýdandyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń basshysy Serik Qamıdollanyń kózine túsedi. Onyń keńesimen atalǵan bólimdegi múmkindigi shekteýli jandardyń qolynan shyqqan buıymdardyń kórmesine qatysty. Mine, sodan bastap Berekettiń óneri kópke tanyla bastaıdy. Atyraýǵa, Astanaǵa shaqyrtý alady. «Pana» qoǵamdyq birlestiginiń muryndyq bolýymen Ystanbuldaǵy túrki álemi sýretshileriniń kórmesine baryp qaıtady. 2017 jyly elimizde ótken halyqaralyq EKSPO kórmesinde de Berekettiń kartınalary álemniń nazaryna usynyldy.
– Teńiz qalashyǵynda ótken sharada aýksıon boıynsha tórt kartınam 377 myń teńgege baǵalanyp satyldy. Astanada ótken forýmda bir kartınamdy áldebir óner baǵalaýshy 80 myńǵa satyp alypty, – deıdi ol. Al byltyr Jylyoıda ótken «Kásipkerler balynda» onyń kartınalary joǵary baǵalandy. Aýksıon boıynsha kesteli, taspen, monshaqpen kómkerilgen kóz tartar týyndylary 3 mln teńgege satylyp, bul qarajat jarynan aıyrylyp, jeti balany baǵyp qalǵan jaǵdaısyz jylyoılyqqa baspanasyn keńitip, jóndep alýǵa jumsaldy. Bereket solaısha óz ónerimen, mańdaıterin tógip jasaǵan eńbegimen bir muqtaj otbasyna járdem berdi.
Degenmen sonshalyqty tózim men ıkemdilikti qajet etetin bul óner odan da qymbat, odan da baǵaly. О́ıtkeni bir ǵana kestedegi krestiń ózi 7 teńge turady eken. Al matanyń betine alýan tústi jippen sýret salyp shyǵý úshin qanshama kesteleý kerek bolady, ony sanap jatýǵa eshkimniń júıkesi shydamas. Sony baǵalaǵandiki me, Beıjińniń ózinde bir kartına 1200 dollar turady. Al bizdiń jaqta 70-80 myń teńgeden joǵary baǵaǵa satyp almaýy múmkin. Áıtse de Bereketti qur aqsha tolǵandyrmaıdy, ol – ónerinen lázzat alyp, bereke taýyp otyrǵan jan.
Berekettiń budan basqa da qyzyǵýshylyǵy kóp. Ol byltyrdan beri múgedekter qoǵamynda ashylǵan tennıs oıynyna da qatysyp júr. Tipti oblys ortalyǵyna baryp, jarysqa da qatysqan. «Jarysta utylyp qaldym, biraq bul meniń qyzyǵýshylyǵymdy odan saıyn arttyrdy», – deıdi jigeri myqty jigit. Keıbireýler jeńilisten muqalyp qalsa, kerisinshe shabyt alatyn ol Atyraýdaǵy múmkindigi shekteýli jandardy sportqa baýlıtyn bapker Gúlnár Ábilqaıyrqyzynyń usynysymen tórt adam bolyp paralımpıadalyq jattyǵý ortalyǵynda daıyndyq jasap, bıyl aqpan aıynda Dýbaıdaǵy búkilálemdik jarysqa baryp, júldeli orynmen oraldy. «Álem tamsanatyn Dýbaıda ne unady?» degen suraǵymyzǵa ol: «Shynymdy aıtsam, Dýbaı unamady. Zańǵar bıik ǵımarattary bolǵanmen, bizdiń eldiń tabıǵaty odan on ese artyq eken, – deıdi jadyrap kúlip. – Barlyq jaǵdaı jasalsa, Qulsaryny Dýbaıdan keremet etýge bolar ma edi!».
Iá, on saýsaǵynan óner tamǵan, kisige úıirilip turatyn, paıdaly is isteýge umtylyp turatyn Bereketti aýdandyq jumyspen qamtý, áleýmettik baǵdarlamalar jáne azamattyq hal aktilerin tirkeý bólimi de nazardan tys qaldyrmaı jumys usyndy. «2015-2016 jyldary «Iýnıksstroı» mekemesi 10 adamdy jumysqa aldy. Onda Bereket uıymnyń basshysy bop taǵaıyndalyp, eki jyldaı jumys istep, múmkindigi shekteýli jandarǵa kásip úıretti», – deıdi jalǵyzbasty qarttar men múgedekterge áleýmettik qyzmet kórsetý ortalyǵynyń dırektory Altynaı Qojıeva. Al qol qýsyryp qarap otyrǵandy qalamaıtyn Bereket «Mekemelerde jumys bolsa, bas tartpas edim» deıdi.
Al óner men sporttan basqa sońǵy kezde jany súıetin hobbıi – kitap oqý. Onyń sol oqıǵadan keıin muń-qaıǵyǵa malynbaı, sanasyn oıatyp, jigerin janyǵan da osy syrlas dosy – kitap bolatyn. Bereket ómirge qulshyndyratyn, iskerlikke úıretetin kitaptardy oqyǵandy jaqsy kóredi. Ol bul kúnderi álemdegi atyshýly jetistikke jetkenderdiń jolnusqaýshysyndaı bolǵan tanymal kitaptardyń birazyn oqyp tastaǵan. Nık Výıchıchtiń, Napoleon Hıldiń, Robın Sharmanyń kitaptaryn támamdaǵan. Búginde Gregorı Devıd Robertstiń mıllıon tırajdy «Shantaram» kitabyn oqý ústinde. Máskeý Memorıaldyq meshitiniń ımamy, kóptegen kitaptardyń avtory Shamıl Alıaýtdınovtyń «Mıllıoner slýshaet» kitabyn oqyp, Aqtaý qalasynda avtordyń ózimen de kezdesken. Bular, sóz joq, onyń ómirge degen kózqarasyn ózgertti. О́z ishki saraıyn saralap, ómirlik túıin túıdi.
Iá, Bereket Aqjigitov arbaǵa tańylyp, tańerteńnen keshke deıin taǵdyryna nala aıtyp, qaıǵy-muńǵa malynyp otyrǵan jan emes, ol – arman-maqsaty bar jigerli azamat.
Saltanat JAQYPOVA
Atyraý oblysy
