Qazir oblys ákiminiń orynbasary Sergeı Karplıýk bastaǵan top Arys qalasynda júr. Quramynda qurylys, tehnıkalyq zertteý uıymdarynyń mamandary bar top jóndeletin úılerdi kórip, tizimge alyp, olardyń qanshalyqty zaqymdanǵanyn, qandaı jumystar júrgiziletinin, qajetti qurylys materıaldarynyń kólemin anyqtaıdy. Soǵan sáıkes kerekti qarjy kólemi anyqtalyp, kóp uzatpaı jumysty bastap ketý maqsaty qoıyldy.
– Jóndeý, qalpyna keltirý jumystary Qostanaı oblysyna bekitilgen 450 úıdiń jartysy kóp qabatty, jartysy jeke sektordaǵy turǵyn úıler. Olardyń zaqymdanýy da ártúrli dárejede ekeni belgili. Úılerdiń qanshalyqty búlingenin, olarǵa jumsalatyn qurylys materıaldarynyń, atqarylar jumystyń kólemin Arysta júrgen bizdiń 8 adamnan turatyn mamandar toby jete zerttep, anyqtap keledi. Olardyń jumysynyń qorytyndysy men tujyrymyna sáıkes qarjy kólemi esepteledi. Biz oǵan negizinen jınalǵan qarjydan jumsaıtyn bolamyz. Al jetpeı jatqanda ǵana bıýdjettik rezervten qarastyramyz. Sondaı-aq men bir-eki kún buryn Qazaqstan halqy Assambleıasynyń oblystyq sessııasynda etnomádenı birlestikterdiń tóraǵalaryna osy jaǵdaıdy jetkizdim. Iri, orta, shaǵyn bıznes ókilderimen kezdesý ótkizdim. Barlyǵy zardap shekken otbasylarǵa gýmanıtarlyq kómek kórsetýge, olardyń turǵyn úılerin qalpyna keltirýge kómektesýge daıyn ekenderin bildirdi, – dedi A.Muhambetov.
Mamandar zertteýinen keıin úılerdi qalpyna keltirý jumystarynyń qalaı tıimdi júrgiziletini de sheshimin tabady. О́ńir basshysy aıtqandaı, merdiger kompanııalar, qurylysshylar, jumys kúshi jergilikti jerden qarastyrylatyn bolsa, Qostanaı oblysy 450 úıdiń qalpyna keltirý shyǵynyn tólep, qurylysshylar men mamandar jibermeý nusqasy da qarastyrylady.
Kúngeıdegi baýyrlarymyz aıtyp kelmegen apattan zardap shegip, bala-shaǵa shýlap jatqanda Tobyl óńirindegi aǵaıynnyń arqasyn aıaz qaryǵandaı boldy. Apat bolǵan kúni-aq Arys turǵyndaryna kómek jumystaryn ortalyqtandyrý úshin jetekshi partııa oblystyq fılıalynyń tóraǵasy retinde oblys ákiminiń basshylyǵymen shtab quryldy. Onyń quramynda Vasılıı Rozınov, Igor Kım, Qaırat Maıshev sııaqty oblysqa belgili kásipkerler men qoǵamdyq pikir kóshbasshylary bar. Apattyń alǵashqy kúni-aq bir kúndik jalaqysyn aýdarý bastamasyn oblystaǵy kóptegen mekeme men memlekettik emes qurylymdar qyzmetkerleri, kásipodaq uıymdary qoldady. Tek memlekettik organdardyń qyzmetkerleri zardap shekkenderge 20 mln teńgeden astam qarjy aýdardy.
– «Qarasý-Astyq» JShS dırektory, Qazaqstannyń Eńbek Eri Almat Tursynov jáne onyń ujymy 3,5 mln teńge, «BK-Stroı» JShS dırektory Igor Kımniń ujymy 2 mln teńge, «Mılh» JShS bas dırektory Sergeı Bloktyń ózi 1 mln teńge aýdardy, – dedi óńir basshysy Arhımed Muhambetov.
Túrkistan oblysyna 20 tonna birinshi surypty un, 7 tonna makaron, 3 tonna kondıter ónimderi jetkizildi. Oblystyń kásipodaq ortalyǵy «Sábı» gýmanıtarlyq aksııasynyń aıasynda 1 jasqa deıingi balalarǵa qostanaılyqtardan jórgekter, balalar taǵamy, gıgıenalyq sýlyqtar sekildi birinshi qajetti zattardy jınaýdy uıymdastyrdy. Alǵashqy júk apattan keıin bir táýlikke jetpeıtin ýaqytta jınalyp, kerýen jóneltilgen edi. Ekinshi júk kerýeni de jolǵa shyǵady.
Oblys ákimi Arhımed Muhambetov jýrnalıster úshin ótkizgen brıfıngte Tobyl-Torǵaı óńiriniń jurtshylyǵyn, kásipkerlerin otandastardyń basyna túsken qıyndyqty birge kóterýge, oǵan salǵyrt qaramaýǵa, qoldan kelgenshe qaıyrymdylyq kómegin berýge shaqyrdy.
QOSTANAI
