Osy taǵylymdy shara bıyl da jalǵasyn taýyp, elimizdiń ár óńirindegi din salasynda eńbek etip júrgen belsendi jastar Altaı aýdanyndaǵy Serebrıanka qalasynyń irgesindegi bulaǵy syldyrap aqqan, aınalasy jasyl jelekke oranǵan, birneshe kıiz úı tigilgen taýdyń baýraıynda bas qosty. «Kúmisbulaq (Serebrıanka) qalasynyń mańyndaǵy bul semınar ekinshi márte uıymdastyrylyp otyr. Bıylǵy qonaqtarymyz Qazaqstan Musylmandary dinı basqarmasynyń jastar sektoryna qarasty kileń jas azamattar. Jastar jylyna oraı qolǵa alynyp otyrǵan sharamyzdyń taǵy bir maqsaty – ár óńirde qordalanǵan máselelerdi birlese sheshý, birizdilikke túsirý. Sondaı-aq Shyǵystyń tumsa tabıǵatyn ózge óńirlerge nasıhattaý», deıdi О́skemendegi «Halıfa Altaı» meshitiniń birinshi naıb-ımamy Dáýlet Tileýhanuly.
Shara barysynda elimizdiń túkpir-túkpirinen kelgen qonaqtar bir-birimen jaqyn tanysyp, pikir almasyp qana qoımaı, jasyl jelek ústine jaıylǵan kilemge shyǵyp, qazaq kúresinen, ózge de sport túrlerinen saıysqa tústi. Arasynda О́skemennen arnaıy kelgen Murathan Kenjehan, Dáýletberdi Jekeı syndy aqyndardyń oqyǵan óleńin tyńdady. Dala tósindegi semınarǵa elimizdiń ár óńirinen 70-ke jýyq jas kelipti. «Munda kelgen jastar taza tabıǵat qushaǵynda salamatty ómir súrý úshin jumys istep jatsa, ekinshi bir jaǵynan dinı saýatyn jetildirýde. Búgingi tańda jastardyń dinge bet burýy óte jaqsy deńgeıde. Meshit jamaǵatynyń 70 paıyzyn osy jastar quraıdy. Biraq olardyń bári dinı saýatty dep aıtý qıyndaý. Sondyqtan biz osyndaı sharalar arqyly bir-birimizben oı bólisip, tájirıbe almasyp jatyrmyz», deıdi Nur-Sultan qalalyq din basqarmasy jastar isi sektorynyń meńgerýshisi Ádilet Kópen.
Shyǵys Qazaqstan oblysy,
Altaı aýdany
