Donald Tramp Soltústik Koreıa shekarasyn attady

Ońtústik Koreıa jerinde AQSh, Sol­tús­tik Koreıa jáne Ońtústik Koreıa arasyn­da tarıhta alǵashqy úshtik sammıt ótti. Bul – Qytaı tarapy qalamaıtyn basqosý. О́ıt­keni Koreı túbegindegi saıası ahýal kóbine Qytaı­dyń saıası múddesine tıimdi bolyp taby­lady. Biraq oıda-joqta jeksenbi kúni Kım Chen Yn men Donald Tramp, Mýn Chje In bir saǵattan artyq kelissóz ótkizdi. Kez­de­sý­den keıin Tramp pen Mýn Chje In til­shi­lerge suhbat berip, Tramp aldaǵy bolatyn sammıtterge baılanysty jańa quramdaǵy is­ker top qurylyp, koreı máselesimen aı­naly­satyndyǵy atap ótti. Tramptyń aıtýyn­sha bul kezdesý shyn máninde tarıhı kez­desý boldy. Ol «Keremet qarym-qatynas or­­nat­tyq, men prezıdent bolýǵa keler aldyn­­da eki jyl buryn jaǵdaı óte nashar edi. Oń­tús­tik Koreıa men Soltústik Koreıa, álem qaýipti jaǵdaıda turǵan bolatyn» dep atap ótti.

1950-1953 jyldary Koreı soǵysy bol­dy. Osy soǵysty toqtatý úshin 1953 jyly AQSh pen Soltústik Koreıa, Qytaı ýaqyt­sha soǵysty toqtatý kelisimine qol qoı­ǵan bolatyn. Ońtústik Koreıa tarapy bul keli­sim­ge qol qoıýdan úzildi-kesildi bas tar­typ, keıin eki eldiń arasy týystyqtan jaýlas­tyqqa ulasyp ketti. Sol soǵystan keıin AQSh pen Soltústik Koreıanyń arasy sýyp ketti. AQSh soltústikti moıyndamady. Qos Koreıanyń arasy da ýshyǵyp ketti. Mine, sol ýaqytsha soǵysty toqtat­qan kelisimge qol qoıylǵan jerge AQSh-tyń prezıdenti 66 jyldan keıin qaıtyp aıaq basyp otyr. Bul – ataqty Pan Mýn Chjom úıi ornalasqan jer. Onda ýaqytsha soǵysty toqtatý týraly kelisimge qol qoıý rásimi ótken. Donald Tramp resmı túrde Soltústik Koreıa topyraǵyn basqan eń alǵashqy prezıdent. Ol týraly Kım Chen Yn tilshilerge bergen qysqasha suhbatynda «Donald Tramp myrza Soltústik Koreıanyń jerin alǵash ret prezıdent retinde basyp otyrǵan adam» dep aıtty. Al Tramp bolsa ony ózine buıyrǵan mártebe retinde qabyldady.

AQSh prezıdenti Kım Chen Ynmen eki eldiń arasyn bólip turǵan áskerı syzyq­tyń dál ústinde turyp kezdesip, qol aly­syp, Kım Chen Ynnyń usynysymen Sol­tús­tik Koreıa shekarasyna qaraı on qadam ótti. Byltyr týra sol jerde Mýn Chje In­men kezdesken bolatyn. Bıyl sol úrdisti qaı­talady. Biraq Mýn Chje Inge qara­ǵan­da AQSh prezıdenti Soltústik Koreıa jerine 10 qadam artyq basyp ishkeri kirdi. Mýn Chje In bolsa, syzyqty attap ótip, bir qadam ǵana asqan bolatyn. Kım Chen Yn Pan Mýn Chjomda bolǵan tarıhı kezdesýdiń mańyzdylyǵyna toqtalyp, «ótken tarıhtaǵy jaman oqıǵalardy tazalaý» dep atap ótti. Sonymen qatar «Tramp myrza men meniń aramyzdaǵy óte jaqsy, tamasha baılanys bolmasa, osyndaı kezdesýdi bir kúnniń ishinde kenetten ótkize almas edik dep oılaımyn. Bul bizdiń tamasha qarym-qatynasymyz – basqalar oılamaǵan, kútpegen jaqsy isterdi toqtaýsyz jasap, aldydan kóldeneń shyqqan kedergilerdi jeńetin erekshe bir kúsh bolmaq» dedi.

Kım Chen Yndy Donald Tramp resmı túrde Aq úıge shaqyrdy. Kım Chen Yn Aq úıge kelýge shaqyrtý alǵan Soltústik Ko­reıa­­nyń alǵashqy kósemi. Donald Tramp ózi Sol­tústik Koreıa topyraǵan basqan al­ǵash­­qy AQSh prezıdenti bolǵanyndaı Kım Chen Yn da Aq úıge alǵash ret kelgen Sol­tús­­tik Koreıa kósemi bolýyn qalaı­tyn­­dy­ǵyn jet­kizdi. Alaıda Kım Chen Yn bul usy­­nys ja­ıynda únsiz qalyp, eshbir oıyn bil­dir­medi. Aldaǵy ýaqytta Donald Tramp­tyń Phe­nıan­ǵa sapary bolýy ǵajap emes. О́ıt­keni qazirgi tańda osy týraly aıtylyp jatyr.

Dastan Aqash,

arnaıy «Egemen Qazaqstan» úshin

 Ońtústik Koreıa,

Seýl