Kitap palatasynyń dırektory Ádil Qoıtanovtyń aıtýynsha, Qazaqstan Jazýshylar odaǵynyń múshesi bolyp tabylatyn árbir qalamgerdiń tegin veb-saıttaryn jasap berý jáne tehnıkalyq qoldaý kórsetý, shyǵarmalaryn bir jerge jınaqtap, birtekti elektrondy bazasyn qurýdy maqsat etetin joba aıasynda Kitap palatasynyń baspasóz muraǵaty negizinde qalamgerlerdiń tolyq bıblıografııalyq anyqtamalyǵy jasalyp, oqyrmanmen, shet eldik jazýshylarmen baılanystaryn damytý máselesi de josparlanyp otyr.
Jaqynda Nur-Sultan qalasynda QR Ulttyq akademııalyq kitaphanasynda ótken jobany tanystyrý rásimine QR Mádenıet jáne sport mınıstrligi Til saıasaty komıtetiniń tóraǵasy Ǵalymjan Meldesh, sondaı-aq Myrzataı Joldasbekov, Tólen Ábdik, Ánes Saraı, Seıit Qasqabasov, Saýytbek Abrahmanov, Qýanysh Jıenbaı, Álibek Asqar syndy zııaly qaýym ókilderi qatysyp, batalaryn berip, qazirgi zamanǵy ádebıet týrasyndy áńgime qozǵady.
«Sıfrly Qazaqstan» baǵdarlamasy aıasynda júzege asyp otyrǵan jańa jobanyń ómirsheń bolatyndyǵyna zor senimin bildirgen QR Mádenıet jáne sport mınıstrligi Til saıasaty komıtetiniń tóraǵasy Ǵalymjan Meldesh «Smart qalamger» otandyq qalamgerler shyǵarmalarynyń qalyń oqyrmanǵa qoljetimdi bolýyna zor yqpal etetinin atap ótti. Osyǵan oraı «Kitap oqý qalyp barady» dep dabyl qaqqan zııaly qaýymnyń óz shyǵarmalaryn zamana talabyna saı usyna bilýi mańyzdy. Jahandaný kezeńinde ýaqyttyń kóshine ilese bilgende ǵana oqyrman aıasy keńeıa túspek. Bul joba qolyna smartfon ustaǵan qazirgi oqyrmannyń kitap oqýyna, rýhanııat dúnıesinen alshaqtap ketpeýine jasalǵan mańyzdy qadam.
QR Ulttyq memlekettik Kitap palatasynyń dırektory Ádil Qoıtanov osy shara aıasynda jazýshylarǵa arnap jasalǵan veb-saıttarmen tanystyryp, saıt ıelerine sertıfıkattar tabys etse, «Aqparattyq-tehnologııalyq ortalyǵy» qoǵamdyq qorynyń prezıdenti Qanat Tańatarov jazýshy qaýymynyń joba týraly suraqtaryna jaýap berdi.
ALMATY
