Munaıshylardyń quryltaıyna kompanııaǵa enshiles jáne táýeldi uıymdardyń basshylary, birqatar qazaqstandyq jáne sheteldik uıymdardyń ókilderi jınaldy. Munaı-gaz ónerkásibindegi ózekti máselelerdi talqylaý úshin alǵash ret merdigerlik uıymdardyń ókilderi shaqyryldy.
Forýmnyń qatysýshylaryn quttyqtaǵan QMG («QazMunaıGaz») basqarma tóraǵasy Alık Aıdarbaev ujym qyzmetkerleriniń eńbek, ónerkásip qaýipsizdigi jáne qorshaǵan ortany qorǵaý máselelerine jumyldyrý kerektigine basa nazar aýdardy.
– Bıyl merdigerlik uıymdarda eńbek pen qorshaǵan ortany qorǵaý boıynsha tıimdi jumysty qamtamasyz etýdiń baǵdarlamasyn iske qostyq. Sebebi olar óndiristik mindetimizdi iske asyrý máselesinde mańyzdy ról atqarady. О́zara tyǵyz baılanysty jaqsartýǵa múmkindik beredi. Kompanııa tobyndaǵy jáne merdigerlik uıymdardyń barlyq qyzmetkerleri úılerine aman oralýy úshin bar kúsh-jigerimizdi salatyn bolamyz, - dedi A. Aıdarbaev.
Sońǵy 4 jyl ishinde otandyq munaı ónimderin óndirýshi kásiporyn qaýipsizdik jáne eńbekti qorǵaý kórsetkishteri boıynsha úzdikter qatarynan oryn alǵanyn aıta ketý kerek. Sondaı-aq jıynda kompanııanyń qorshaǵan ortaǵa teris áserin azaıtý jáne sý resýrstaryn basqarý, eńbek qaýipsizdigi men apattardy aldyn alý, saqtyq sharalaryn arttyrýǵa qatysty birinshi basshylardyń derbes jaýapkershiligin kúsheıtý máselesi qaýzaldy.
О́ndiriste jaraqat alý jáne qorshaǵan ortaǵa zalal keltirýde nóldik kórsetkishke jetý úshin atalǵan uıym Qazaqstanda alǵash ret SPE Kaspıı sımpozıýmyn ótkizýge bastama kótergen. Atalǵan shara qyrkúıek aıynda KAZENERGY forýmy sheńberinde ótetin bolady.
Jaqsylyq MURATQALI,
«Egemen Qazaqstan»
