Otpan taýǵa oń kózqaras qajet

Keshenniń ashylý saltanatynda Elbasy N.Nazarbaevtyń joldaǵan quttyqtaý haty oqyldy. «Kóne de qasıetti Mańǵystaýda san qıly syn saǵattarynda uran otyn jaqqan kári seńgir Otpan taýdyń búginde máńgilik otyn mazdatar taǵzym bıigine aınalýy jan súısiner jańalyq, ótkenge degen qurmet – bolashaqqa degen jaýapkershiliktiń bıik ónegesi der edim. Bul keshen túbi tereń tarıhymyzdy urpaq­ta­rymyzdyń esine salyp, júrek­terine ımandylyq nuryn seýip, uly murattarǵa úndep turatyn bolady. Ol, sondaı-aq Mańǵystaý óńirine joly túsetin qazaqstandyqtar men sheteldik týrısterdiń de arnaıy izdep baryp táý etetin qasıetti mekenjaıyna aınalady dep úmittenemin» degen bolatyn. 

Aıtqandaı-aq kóptegen mádenı, tanymdyq, patrıottyq jáne rýhanı kópshilik sharalardyń izgi ordasyna aınalyp úlgergen keshende qysy-jazy urpaqty tárbıeleý, ótkendi jańǵyrtý baǵytyndaǵy jumystar jalǵasyn taýyp keledi. Alys-ja­qyn­nan kelgen týrısterdiń at basyn tirer núktesine aınaldy. Eli­mizde júrgizilip jatqan «Rýhanı jańǵyrý» baǵdarlamasynyń maq­sat-mindetimen úndes shara­lar­dyń qyzý ordasyna aınalǵan. 

Qysta saıatshylar men qusbe­gilerge arnalǵan «Salbýryn», kók­temde ólkemizde jańa jyl bop esepteletin «Amal» merekesi, Ekin­shi dúnıejúzilik soǵysqa qatysqan batyr jerlesterdiń erligine arnal­ǵan «Er esimi óshpeıdi el esinen», «Aǵadan – aqyl, atadan – bata» atty aqyndar kezdesýi, jazda jas­tarǵa ar­nalǵan «Aı astynda alty­baqan» atty et­nografııalyq sha­ralar dás­túr­ge aı­nalyp, turaqty ótkizilip keledi.

Keleshekke josparlanǵan tatymdy sharalar da az emes. Solardyń biri – bıyl kúzde Mańǵystaý ob­lys­tyq aýylsharýashylyq bas­qar­masymen birigip eginshiler men mal­shylarǵa arnalǵan «Eńbek mereıi» merekesin ótkizý. 

Mańǵystaý – týrıstik áleýetti arttyrýǵa zor múmkindigi bar ólke, oǵan memleket tarapynan qoldaý kórsetilip te keledi. Dala kezip, Mań­­ǵystaýdyń tabıǵatyn tamashalap júrgen árbir týrıst Otpan taýǵa kel­meı ketpeıdi. Shetten kelgen týrısterge qyzmet kór­setýde olqy soǵatyn tustar – quz­yr­ly oryndarǵa qan­sha aıtqanmen, áli sheshimin tappaı kele jatyr. 

Kelim-ketim qonaqtardyń jaı­ǵasýy úshin qajetti shaǵyn qonaqúı, namazhana, kólik pen ǵalamtor jelisi, jol máselesi, sondaı-aq zamanaýı ájethana qazirgi tańda keshen úshin qajetti nysandar bolyp tur jáne keshen basshylyǵynyń aıtýynsha, sheshimin tappaı keledi.