Osydan on jyl buryn tarıhı Otanyna taban tiregen S.Sembaı – elinde eleýli eńbek etip júrgen qandasymyzdyń biri. Bizdi tánti etkeni aýyl balalarynan quralǵan «Sadat» jáne «Aqerke» bı toptarynyń respýblıka deńgeıindegi kórkemónerpazdar baıqaýynda kósh basynan kórinip, kóptegen báıgelerde joǵary nátıjege qol jetkizgeni. О́zi negizin qalaǵan qos birdeı bı tobyna jetekshilik etetin Sádetpen áńgime barysynda, tabandy qyzdyń boıynan talmas qýattyń tasqynyn kórgendeı boldyq. «Maqsatym – qaradomalaq aýyl balalarynan Shara men Shuǵylanyń jolyn jalǵaıtyn shákirt tárbıeleý», – dedi ol áńgime arasynda.
– Bımen aınalysýǵa túrtki bolǵan bala kezdegi armanym. Bıshilik óner qyz balasyn ásemdikke, náziktik pen ádemilikke baýlıdy. Túrli qımyl-qozǵalys symbatyńa sán berse, ásem áýen yrǵaǵy janyńdy sulýlandyra túsedi. Jany súıgen kásippen aınalysqan jan sharshaýdy bilmeıdi, shyǵarmashylyǵy arqyly ózin baqytty sezinedi. Nege aýyl balalaryn bı ónerine baýlymasqa degen oıǵa keldim. Aýyldyń mádenıet úıinen jeke bı úıirmemdi ashtym. Budan bólek, «Keleshek» bóbekjaı balabaqshasynda án-bı jetekshisi bolyp jumys isteımin. Bı álemine qulshynyp kelgen shákirtterimniń bárine birdeı kóńil bólýge tyrysamyn. Degenmen, úıirme tabaldyryǵyn attaǵan balalar ýaqyt óte kele iriktelip, ıkemi barlary daralana bastaıdy. Meńgere almaǵandarynyń ózi kóshbasshylyq qabileti damyp, shıraı túsedi. Bala degen alǵaýsyz tunyq álem. Ol bir nársege sense, soǵan janymen beriledi. Shákirtterimniń boıynan sál de bolsa talant ushqynyn baıqasam, sony ári qaraı mazdatyp áketýge barymdy salamyn. Anyq kózim jetkeni tógilgen ter, óteýsiz qalmaıdy. Oqýshylarymmen birge oblystyq, respýblıkalyq baıqaýlarda baq synap jaqsy nátıjelerden kórinip júrmiz, – deıdi S.Sembaı.
