– Kórdiń be, keýil gúldepti, – dedi.
Maǵan onyń daýsy dirildep, tolqyp, úzilip-úzilip jetkendeı boldy.
Tańdana qarap, ún qata almaı qaldym. Aq quba óńdi, botagóz, erke qyzdyń erekshe súıkimdi ekenin men sol sátte alǵash ret baıqaǵan sııaqtymyn.
Onyń ózi de mynaý jap-jasyl keýildiń appaq gúlderine uqsaıtynyn aıtqym keldi. Biraq ańdaýsyzda úf dep qalsam, aq kóbelekke aınalyp, usha jóneletindeı bop úlbirep turǵan sulýlyqty úrkitip alarmyn dep oıladym.
Qyr jaqtan belesebetimdi jetektep túsip kele jatqanymda da oǵan qaıta-qaıta jaltaqtap qaraı berdim, qaraı berdim.
Aq quba júzi qyzaryp, alǵa basqan adymy keri ketip, kibirtiktep, uıala bastaǵanyn sezsem de, sezbegendeı boldym. Sebebi odan endi kózimdi ala almaıtyn sııaqtymyn.
Kenet ol maǵan jalt qarap:
– Men endi seniń belesebetińe minbeımin, – dedi.
– Nege?
Aýzym ashylyp, qalt toqtaı qaldym. Mássaǵan!.. Ol ekeýmizdi tanystyrǵan da, dostastyrǵan da osy belesebet emes pe edi. О́ıtkeni aýyldaǵy eń jańa, eń táýir belesebet meniki ǵoı.
Ol úndemedi. Syqylyqtap kúlip, aýylǵa qaraı júgire jóneldi. Al men bolsam, áli de ań-tańmyn. Sebebi onyń ózi emes pe edi, búgin: «Qyr jaqqa shyǵyp, eshkim kórmeıtin jerde meni belesebetińe mingizshi», dep ótingen...
Qazir oılaımyn, ol meniń ózine qadala qaraǵan kózimnen emes, qyz júregindegi alǵash oıanǵan ózgeshe bir qupııa, syrly sezimnen uıaldy-aý dep.
Bala kezdegi sol bir uıań, kirshiksiz taza sezimniń kóńil túkpirinde buıyǵyp, alańsyz uıyqtap jatqanyn men búgin taǵy da sezip turǵan sııaqtymyn. О́ıtkeni bıyl jazǵa salym jap-jasyl bop jaıqalyp, appaq gúlin ashqan bekzat, pań keýildi kórgende, júregim jáne bir shym ete qalǵanyn qarasańyzshy.
Qudaı-aý, eki arada biz keship óte almaıtyn ýaqyt teńizi paıda boldy emes pe. Biraq myna keýildiń soǵan qaramaı, tú-ý baıaǵy tátti kúndi eske salyp, kóńilimdi tolqytyp turǵanyn kórmeısiz be...
Bálkim, bilersiz, bálkim, bilmessiz, keýil degenimiz – keń dalada ósetin kópjyldyq ósimdik qoı. Túıejantaq sekildi onyń da tamyry tereńge jaıylyp, jer astyndaǵy sý kózderinen nár alyp jatady. Appaq gúlderi jelge ushyp, túıin salǵannan keıin, kip-kishkentaı qarbyz sekildi jemisteri kúnnen-kúnge úlkeıip, barmaqtaı-barmaqtaı bolyp pisedi de, óz-ózinen jarylyp, qyp-qyzyl shyryny jerge tamady. Bala kúnimizde biz onyń da dámin tatyp kórgenbiz. Sál-pál kermekteý bolady.
Endi mine, elý jyldan soń sol baıaǵy aýylǵa qaıta oralyp, sol baıaǵy keýilge qyzyǵa qaraımyn-aı. Onyń appaq gúlderi sol baıaǵy aq quba, botagóz, erke qyzǵa uqsaıdy.
Qaıran keýil, qaıran kóńil...
