Shildeniń 4-6 kúnderi elordalyq alańdarda H «Astana samaly» úrmeli aspaptar orkestrleri festıvali bastalady. 6 shilde kúni tańerteń sharaǵa qatysatyn orkestrlerdiń sherýi ótedi. Sodan keıin qalalyq alańda qala turǵyndary men qonaqtarynyń nazaryna plas-konsert usynylady.
Án súıer qaýym 5-6 shildede karaokeden «Bári de án shyrqaıdy!» chempıonatyna qatysady. Balalar men eresekter án aıtýdan jarysady. Halyqtyq karaoke Esil ózeniniń jaǵasyndaǵy Amfıteatrda ótedi.
Uly qazaq aqyndarymen, jas jazýshylardyń shyǵarmashylyǵymen etene tanysqysy keletin jandar úshin elordada «Nur-Sultan – elimizdiń bas qalasy, Jastar – bolashaqtyń bastamasy!» atty kitap pen poezııa keshi uıymdastyrylady. 5 shildede Abaı eskertkishiniń janynda Abaı oqýlary, mánerlep oqýshylar baıqaýy, kitap kórmesi ótip, teatrlandyrylǵan qoıylymdar kórsetiledi.
Osy kúni Qalalyq alańda «International Street dance Session in Astana» halyqaralyq kóshe bıi festıvali uıymdastyrylady. Jınalǵan qaýym bı bıleýden toptyq jarystar men jekpe-jekter tamashalaıdy.
Munymen qosa, EKSPO aýmaǵyndaǵy jazǵy sahnada The Spirit of Eurasia 2019 halyqaralyq zamanaýı etnıkalyq mýzyka festıvali ótedi. Munda artıster óner kórsetip qana qoımaı, sheberlerdiń etnıkalyq qalashyǵy men jármeńke ashylady.
6 shildede Promyshlennyı, Internasıonalnyı, Jeleznodorojnyı, Prıgorodnyı, Úrker, Kóktal-1 turǵyn alaptarynda búkil otbasyǵa arnalǵan «Dýmandy Saryarqa» merekelik baǵdarlamasy kópshilik nazaryna usynylady. Shara aıasynda estrada juldyzdary óner kórsetip, mýltfılm keıipkerleriniń kıimin kıgen anımatorlar kishkentaı elordalyqtarǵa kóterińki kóńil kúı syılaıdy.
Merekelik baǵdarlamada sport súıer qaýymǵa arnalǵan sharalar da qarastyrylǵan.
Olardyń qatarynda «Bolashaq ańyz tulǵalar» atty kásipqoı boks keshi de bar. 6 shildede «Barys Arena» muz aıdyny saraıynda keshtiń basty jekpe-jegin buǵan deıin jeńilis tappaǵan qazaqstandyq bylǵary qolǵap sheberi Jańqosh Turarov ótkizedi.
Elorda kúnine arnalǵan saltanatty sharalar legin Ulttyq Dombyra kúnine arnalǵan konsert aıaqtaıdy. Shara 7 shildede «Qazaq Eli» monýmentiniń aldyndaǵy alańda saǵat 12.00 ótedi. Sondaı-aq, osy kúni keshke saǵat 17:00-de Amfıteatrda óner súıer qaýym «Naǵyz qazaq dombyra» atty konsertti tamashalaıdy.
Merekeniń sońǵy kúnderi 7-8 shildede Amfıteatr sahnasynda taı artısteri «Taı túnderi» atty konserttik baǵdarlamasyn usynady. Bul shara Taıland Koroldiginiń Qazaqstandaǵy elshiliginiń elorda kúnine tartqan syıy bolmaq. Sondaı-aq, konsert Nur-Sultan men Bangkok qalalarynyń baýyrlastyq qarym-qatynasynyń 15 jyldyǵyna oraılastyrylǵan. Qala kúnine arnalǵan merekelik sharalar týraly tolyq aqparat www.astanaday.kz resmı saıtynda jarııalanǵan.
