Qyzylorda qalasynyń irgesindegi «Sabalaq» saıajaıynyń mańyndaǵy aǵysy qatty kanalǵa sýǵa túsken 55 jastaǵy azamat sýǵa ketip qaldy. Denesin «Ońtústik óńirlik aeroutqyr jedel qutqarý jasaǵy» mekemesiniń mamandary taýyp, jaǵaǵa shyǵardy.
Keshqurym ýaqytta ruqsat etilmegen jerde sýǵa túsken 15 jasar qyz bala da tilsiz jaýdyń qurbany boldy.
Jyl basynan beri oblysta osyndaı 17 oqıǵa tirkelgen eken. О́limniń qaı-qaısysy da aıanyshty degenimen, osy adamdardyń qatarynda segiz balanyń bolǵany ózekti órteıtin ókinish.
О́ńirlik kommýnıkasııalar qyzmetinde ótken baspasóz konferensııasynda «Ońtústik óńirlik aeroutqyr jedel qutqarý jasaǵy» memlekettik mekemesiniń basshysy Baqyt Embergenov keıingi kezderi sýǵa túsýden jıilegen qaıǵyly qazalar jaıynda aıtty.
«Oblystyń sý aıdyndarynda, ásirese, Syrdarııa ózeninde jylda azamattardyń ártúrli sebeptermen qaıǵyly jaǵdaılarǵa ushyraýy, onyń ishinde sýǵa shomylý maýsymynda sýdaǵy adam qazasy ózekti másele bolyp otyr. О́tken jyly sýǵa 22 adam ketken. Aıtar bolsaq, 3 adam balyq aýlaý kezinde, 9 adam sýǵa túsýge arnalmaǵan jerde, oqys jaǵdaıdaı 2 eresek, 2 bala, belgisiz jaǵdaıda 1 adam kóz jumdy.
Sýda adamdardyń qaza bolýyna qaýipsizdik erejelerin óreskel buzý sebep bolady. Atap aıtsaq, ózen nemese kanaldardyń kez-kelgen, ári zerttelmegen, aǵysy jyldam, tereń, jaǵalary tik jar jerlerine sýǵa túsýi, balalardyń eresekterdiń baqylaýsyz sý jaǵasyna barýy men sýǵa túsýi jáne olardyń júze bilmegendigi qaıǵyly oqıǵalarǵa ákelip soqtyryp jatyr. Buǵan qosa, sýǵa túsý qaýipti aımaqtarda azamattardyń ruqsat etilmegen júzý quraldaryn qoldanýy jáne alǵashqy kómek kórsetý tásilderin bilmeıtindigi de sý aıdyndarynda oqys jaǵdaılardyń sanynyń kóbeıýine yqpalyn tıgizýde. Departament jáne onyń bólimsheleri 2019 jyldyń basynan azamattardyń sýda qaýipsizdik sharalaryn saqtaý baǵytynda jumystar júıeli túrde júrgizip jatqanymen, ókinishke qaraı, osyndaı jaǵdaılar oryn aldy», dedi Baqyt Embergenov.
Búginge deıin jazǵy sýǵa túsý maýsymynan beri qaýipsizdikti qamtamasyz etý maqsatynda oblysta 420 reıd ótkizilip, sonyń barysynda 3093 adamǵa túsindirý jumysy jasalyp, 3192 jadynama taratylypty.
Oblys boıynsha ótken jyly 225 jerge «Sýǵa túsýge bolmaıdy!» degen jazýy bar eskertý taqtaılary ornatylǵan bolatyn. Qazir sol taqtaıshadan 157-si ǵana qalǵan. О́ıtkeni turǵyndar, ásirese, jastar osy eskertý taqtaıshalaryn syndyryp, ornatylǵan jerlerinen alyp tastaıdy. Mysaly, qala boıynsha 27 taqtaısha ornatylǵan, bıyl sonyń 11-i ǵana qalǵan. Taqtaıshalarǵa nazar aýdarmastan sýǵa túsip, sýǵa batý faktileri oryn alýda.
