- Elektrobýstar qala turǵyndarynyń qozǵalysyn jaıly etip qana qoımaı, qoǵamdyq kólikti damytýdyń jańa draıverine aınalady. Elektrobýstar qatty dybyssyz júredi ári aýaǵa taralatyn zııandy qaldyqtar shyǵarmaıdy,-deıdi oblys ákimi Bolat Baqaýov.
Elektrobýstardyń birin júrgizip kórdi. Ol rýlge ózi otyryp, qala ishimen júrdi. Biraq, ishi-syrty ábden tozǵan, jolaýshylarǵa asa qaýipti shaǵyn avtobýstardy da júrgizip kórse, óz kózimen «jaıly jaǵdaıdy» kórer edi.
Qaladaǵy «№1 avtobýs parki» JShS-niń málimetinshe, 20 «Ankaı» markaly dızel otynymen júretin avtobýstar jetkizildi. Sonymen birge, syıymdylyǵy úlken elektrobýstar keldi. Nátıjesinde, qalalyq avtobýs parki 76 paıyzǵa jańardy.
Jańa qoǵamdyq kólikter №5, 10, 21, 22 baǵyttaryndaǵy qalalyq marshrýttarda, sondaı-aq, oblys ortalyǵynyń aýyldyq aýmaqtarynyń arasyndaǵy marshrýttarǵa qyzmet kórsetedi. Elektrobýstar 2013-2020 jyldarǵa arnalǵan elimizdiń «Jasyl ekonomıkaǵa» kóshý Konsepsııasyn júzege asyrý sheńberinde satyp alynypty.
- Avtobýstar men elektrobýstarda jolaýshylardyń jaılylyǵy úshin, ásirese, múmkindigi shekteýli jandar úshin barlyq jaǵdaı jasalǵan, – dedi «Báıterek» holdınginiń basshysy Aıdar Áriphanov. – Elimizde birneshe kásiporyn elektrobýstardy jasap shyǵarýmen aınalysady.
Sonymen qatar, Pavlodarǵa 4 jańa tramvaı jetkizildi. Tramvaı basqarmasynyń kólikterin jańǵyrtý sheńberinde qyrkúıek aıynda belorýstyq «BelKommýnMash» zaýytynda qurastyrylǵan taǵy da 5 vagon ákelinýi kerek.
Pavlodar
Sýretti túsirgen: Valerıı Býgaev
