Ortalyq kommýnıkasııalar qyzmetiniń alańynda ótken baspasóz konferensııasynda atalǵan is-sharanyń jaı-japsary baıandaldy. Aldymen «Jas Otan» jastar qanatynyń tóraǵasy Dáýlet Káribek «Jastar alańy 2019» pikirsaıys týrnıriniń erekshelikteri týraly aıtyp berdi.
– Tushymdy oı, oryndy sóz álemdegi bolyp jatqan kóptegen keleńsiz jaǵdaılardy retteýge zor yqpalyn tıgizedi. Sózge toqtaý, bitimgerlik, ymyrashyldyq – qazaqtyń qanyna sińgen jaqsy qasıetteri. Sondyqtan jastardyń oı-pikirin qalyptastyrý, Qazaqstandaǵy pikirsaıys alańdaryn qaıta jandandyrý úshin bıyl Aqparat jáne qoǵamdyq damý mınıstrligimen birge osy úlken jobany iske asyrýdy qolǵa aldyq. Joba aıasynda jastardy tek pikirsaıysqa qatystyryp qana qoımaı, olardyń oqyp, bilimderin keńeıtýine de jaǵdaı jasalady. Sondaı-aq tóreshilerge de arnalǵan trenıngter ótedi. Jalpy, jastar alańyna 120 jas jınalady. Jobanyń taǵy bir ereksheligi, onyń arnaıy saıty jasaqtalady, mobıldi qosymshasy da ázirlenedi. Onda tirkelgender júıeli túrde sońǵy maǵlumattarǵa qanyǵyp, pikirsaıysshylardyń reıtıngin, jetistikterin baqylap otyrady. Munyń bári – pikirsaıysshylardyń qoǵam nazarynan tys qalmaýǵa, shyǵarmashylyq baǵyttaryn damytýǵa óte úlken múmkindik, – dedi D.Káribek.
Budan keıin «Azamattyq bastamalardy qoldaý ortalyǵy» KEAQ basqarma tóraǵasy Batıma Mýkına Jastar jyly aıasynda qolǵa alynǵan jobalarǵa toqtaldy. Onyń aıtýynsha, ortalyq 109 áleýmettik jobany júzege asyryp jatyr eken. Sonyń ishinde 44 joba jastardy qoldaýǵa baǵyttalypty. Osy ortalyq uıymdastyrǵan konkýrstyń granty atalǵan pikirsaıys týrnırin uıymdastyrýǵa sep bolypty. «Jastar alańy 2019» pikirsaıys týrnıriniń jalpy júlde qory – 4 mln teńge.
