Oqytý kýrsyn támamdaǵan bıznes bapkerler mektep oqýshylaryn ekonomıka, qoǵam, eńbek ómiri jáne kásipkerlik negizderine baýlyp, iskerlik qabilettilikterin shyńdaıtyn bolady.
Aıta ketý kerek, bul jobany «Jastar qyzmetkerleriniń qaýymdastyǵy» «Azamattyq bastamalardy qoldaý ortalyǵymen» áriptestikte Aqparat jáne qoǵamdyq damý mınıstrliginiń qoldaýymen júzege asyryp keledi.
Búginde atalǵan baǵdarlamanyń alty jáne toǵyzynshy synyp oqýshylaryn oqytýǵa arnalǵan oqý-ádistemelik kesheni ázirlenip qoıǵan eken.
Muǵalimderdi daıarlaýdy Generation Unlimited (GenU) baǵdarlamasynyń sertıfıkatyn alǵan bapkerlerdiń ulttyq pýly ári bıznes-jattyqtyrýshylar júrgizgenin atap ótken jón.
«Trenıngten keıin jattyqtyrýshy-muǵalimder jergilikti jerlerde jobaǵa sáıkes bilim berý ádisi boıynsha altynshy jáne toǵyzynshy synyptardyń 6800 oqýshysyn oqytatyn bolady. 6800 oqýshy ár óńirden eki qanatqaqty mektepten, tórt parallel synyptaǵy 25 adamnan quralady», – deıdi uıymdastyrý alqasynyń ókili Aıdar Hamıt.
Taǵy bir aıtar jaıt, osy joba boıynsha qanatqaqty negizde Atyraý oblysynda bıznes qalashyq turǵyzylyp jatyr. Bul qalashyq Fınlıandııadaǵy «Men jáne meniń qalam» («Me and My City») ortalyqtary jelisiniń negizinde salynýda jáne balalar men jasóspirimderdiń áleýmettik hám kásipkerlik daǵdylaryn damytýǵa, jastardyń áleýmettik máselelerin aldyn alýǵa baǵyttalǵan.
Jaqsylyq MURATQALI,
«Egemen Qazaqstan»
