Olardyń arasynda mamandyǵyn salyq jáne keden organdarymen baılanystyrǵysy keletinder de bolady.
Oblys boıynsha Memlekettik kirister departamentiniń basshysy Ǵalymjan Orynov aımaqtaǵy joǵary jáne orta arnaýly oqý oryndarynyń basshylarymen kezdesýinde osy mamandyqty tańdaǵan jastardyń qazirden bastap salyq zańdylyqtarynyń, salyq tóleý júıesiniń qalaı jumys istep jatqandyǵyn bilgenin jón sanaıtyndyǵyn aıtty.
Kezdesý barysynda taraptar ekijaqty yntymaqtastyq týraly memorandým jasasty.
Kezdesýde departament basshysy boljamdalǵan kiris kózderi boıynsha salyqtyq jáne basqa da mindetti tólemderdiń bıýdjetke túsýin qamtamasyz etý basty mindet ekenin jetkizdi. Oblysta sońǵy 5 aıda memlekettik bıýdjetke barlyǵy 70 mlrd 310 mln teńge óndirilgen. Mejelengen jospar 59 mlrd 209 mln teńge bolsa, joǵarydaǵy kórsetkish jospardyń 118,7%-ǵa nemese 11 mlrd 101 mln teńgege artyq oryndalǵanyn baıqatady.
– Salyq tólemderiniń tolyq jınalýy – memlekettiń óz mindetterin tolyq oryndaýǵa múmkindik beredi. Jınalǵan qarjy birinshi kezekte ustazdardyń, dárigerlerdiń jalaqysyna jáne zeınetaqyǵa jumsalatyny belgili. Sondyqtan memlekettik kirister organy úshin salyqty ýaqytyly tóleýge úgit-nasıhat jumystaryn júrgizý – basty mindetterdiń biri. Al osy iske sizder de atsalysyp jatsańyzdar, ol nur ústine nur bolar edi, – degen Ǵalymjan Qaldykózuly yntymaqtastyq memorandýmy aıasynda stýdent jastar úshin kóptegen sharalar belgilenip otyrǵandyǵyn aıtty.
Departament basshysy stýdentterdi kiris organdarynda tájirıbeden ótýge shaqyryp, jaqsy jaǵynan kóringen stýdentterdiń bolashaqta memlekettik kirister organdary men osy salaǵa qatysty jumystarǵa ornalasýy úshin qoldaý bolatyndyǵyn jetkizdi. Kezdesý sońynda memorandýmǵa Ǵalymjan Orynov jáne Qorqyt ata atyndaǵy QMÝ rektorynyń mindetin atqarýshy Baqythan Ábdikárimov, «Bolashaq» ýnıversıtetiniń rektory Qýanysh Dáýrenbekov, Qazaq gýmanıtarlyq zań jáne tehnıkalyq joǵary kolledj dırektorynyń mindetin atqarýshy Qanat Aqpanov, Qyzylorda ınjenerlik-tehnıkalyq kolledj dırektory Isa Jeterbaev qol qoıdy.
