Oǵan jyl saıyn óziniń sapaly ónimimen jańa kásiporyndar legi qosylyp otyrady. Bıylǵy baıqaý-kórmeniń de jańalyqtary az bolǵan joq. Byltyr jyl aıaǵynda Rýdnyıda sement zaýyty, Arqalyq qalasynda «Arqalyq Et» et kombınaty ashylǵan edi. Osy kásiporyndar jarty jyl ótpeı-aq ónimderiniń sapasyn báıgege qosty.
Qazir Rýdnyı sement zaýyty qurylystyń qandaı túrine bolsa qoldanylýǵa jaraıtyn, sementtiń keń taralǵan PS 400-D0 jáne PS 500-D0 markalaryn óndiredi.
Zaýyt ónimin qazir Nur-Sultan, Aqtóbe oblystaryna jiberedi, Qostanaı oblysyn tolyq qamtamasyz etedi. Qazirdiń ózinde zaýyt kenshiler qalasynyń 200 turǵynyn jumyspen qamtamasyz etip otyr.
«Qazaqstannyń úzdik taýarlary» oblystyq baıqaý-kórmesine qatysqan ár kásiporynnyń tusyna barǵanda, kásipker osylaı tartymdy áńgime tıegin aǵytady. Bul joly oblystaǵy qyryq shaqty kásiporyn sapa báıgesine baǵyn synaǵaly kelipti. Biraq oblys ákimi Arhımed Muhambetovtiń aıtýynsha, baıqaý-kórmeniń maqsaty tek sapany tarazyǵa salý ǵana emes, odan da keń.
– Bes jyl ishinde oblystaǵy 36 kásiporyn sapaly ónimderimen baıqaý-kórmeniń respýblıkalyq fınalynan kórindi. Olardyń qatarynda dabyly elimizge, syrt jerlerge belgili «Baıan sulý» kondıter fabrıkasy, «Mılh» sút zaýyty, Qostanaı un kombınaty, «AgromashHoldıng» mashına qurastyrý zaýyty jáne taǵy basqa iri kásiporyndar bar. Mundaı baıqaý-kórmeler óte qajet, munda bıznes ókilderi bir-birinen úırenedi, tájirıbe almasady. Bıznes úshin eń bastysy óndirilgen ónimniń ótýi, suranysqa ıe bolýy. Naryqty zertteý úshin de baıqaýlardyń mańyzy zor, – dedi Arhımed Muhanbetov.
Baıqaý-kórmede sapaly et ónimderi men bal, qymyz, shubatqa turǵan kezekti kórseńiz... Oblystyń ishki jalpy ónimindegi shaǵyn jáne orta bıznestiń úlesi kóbeıip, bıyl jyl basynan beri ol 28 paıyzdy qurady. Osy kólemniń ishinde azyq-túlik óndiretin kásiporyndar úlesi de ulǵaıa bastady. Mysaly, jumysyn byltyr jyl aıaǵynda bastaǵan «Arqalyq Et» et kombınaty tek sapaly et pen et ónimderin óndirip qana qoımaı, oblystyń ońtústik aýdandaryndaǵy mal sharýashylyǵynyń damýyna da yqpal ete bastady. Ol «Qazaqstannyń úzdik taýarlary» oblystyq baıqaý-kórmesinde «Úzdik azyq-túlik taýarlary» atalymy boıynsha jeńimpaz atandy. «О́ndiristik maqsattaǵy úzdik taýarlar», «Halyq tutynatyn úzdik taýarlar» atalymy boıynsha da jeńimpazdar anyqtaldy. Olardyń arasynda Rýdnyı sement zaýyty, ulttyq kıimder tigetin «Dombaeva E.S» jeke kásipkerligi, maldyń sapaly jemin shyǵaratyn «Germes-4» kásiporyndary, taǵy basqalary bar.
