Oblys ortalyǵyna jaqyn, Jaıyq ózenin jaǵalaı ornalasqan aýdanda 15 aýyldyq okrýg, 52 eldi meken, 38 myńnan asa turǵyn bar. Osy halyqtyń 60 paıyzy, ıaǵnı 22 603 adam ekonomıkalyq belsendi turǵyndarǵa jatady. Olardyń deni aýyl sharýashylyǵy, kásipkerlik salalarynda eńbek etip, óziniń de, eldiń de ekonomıkalyq damýyna úles qosyp júr.
Árıne el ishinde túrli taǵdyr kezdesedi. Ártúrli sebeppen jaǵdaıy nashar, aýqaty tómen bolǵan otbasylar da bar. Erte zamanda mundaı adamdarǵa aýyl aqsaqaldar, el aǵalary, tipti aýyl bolyp kómektesetin. Jetimdi jebep, jalǵyzdy demep, basyna úı tigip, aldyna mal jıyp bergen oqıǵalardy kóne áńgimelerden talaı estidik. Búginde bul fýnksııany memleket atqarady.
– Kúni búgin Terekti aýdanynda 431 adam resmı túrde jumyssyz retinde tirkelgen. Al memleketten ataýly áleýmettik kómek alatyndar sany aýdan boıynsha 847 otbasy. Bul otbasylarda 4216 adam turyp jatyr. Sonyń 2435-i – jasy 18-ge tolmaǵan balalar, – deıdi Terekti aýdandyq jumyspen qamtý jáne áleýmettik baǵdarlamalar bólimi basshysynyń mindetin atqarýshy Álıma Luqpanova.
Álıma Abylaıqyzynyń aıtýynsha, joǵarydaǵy toptyń ishinde 239 shańyraq kóp balaly otbasy sanalady. Iаǵnı, bul úılerde 4 jáne odan da kóp bala tárbıelenip jatyr.
Mine, osyndaı jumyssyz júrgen terektilikterdi suranysqa ıe mamandyqtarǵa oqytý, kásipkerlikke baýlý aýdanda jaqsy jolǵa qoıylǵan. Bul kómek eń aldymen ataýly áleýmettik kómek alýshy otbasy múshelerine usynylady. Bıyldyń ózinde osyndaı otbasylardan 37 adam aqyly qoǵamdyq jumysqa, 8 adam áleýmettik jumysqa, 1 adam jastar tájirıbesine tartylypty. 9 adam qysqa oqytý kýrstaryna joldanǵan.
2018 jyly «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda aýdan boıynsha 365 397 000 teńgege 96 nesıe berilgen eken. Al «Bastaý Bıznes» baǵdarlamasy tyńdaýshylary 289 645 000 teńgege 74 nesıe alǵan. Budan bólek «Aýyl sharýashylyǵyn qarjylaı qoldaý qory» arqyly 249 145 000 teńgege 64 nesıe, «Agrarlyq nesıe korporasııasy» AQ-y arqyly 40 500 000 teńgege 10 nesıe berilgen. 2019 jyldyń 5 aıynda aýdan boıynsha jalpy kólemi 24 000 000 teńgeniń 5 nesıesi ıesin taýypty. Munyń bári óz kásibin ósirip, órkendetem degen aýyl turǵyny úshin naqty kómek ekendigi sózsiz.
Bir táýiri, memlekettiń kómegin oraıymen paıdalanyp, naqty kásipke aınaldyrǵan otbasylar da kóbeıip keledi eken. Solardyń biri – Toqtarovtar otbasy týraly Á.Abylaıqyzy súısinip aıtady.
Iá, Barbastaý aýylynda turatyn Toqtarovtar otbasynda jıyrmanyń ústinde jan turady eken. Áýlettiń úlkeni Juma apaı – úsh balasynyń otbasyn bir shańyraq astynda tatý-tátti ustap otyrǵan berekeli báıbishe bolyp shyqty. Kelinderiniń biri Gúlaıman – jeti balanyń, al Samanta – bes balanyń anasy eken.
