Salalyq alalaý bolmaıdy
Indýstrııa jáne ınfraqurylymdyq damý vıse-mınıstriniń aıtýynsha, bıyl jyl sońyna deıin 2020-2025 jyldarǵa arnalǵan ındýstrııalandyrý baǵdarlamasy bekitiledi.
– Elbasynyń tapsyrmasynyń aıasynda jyl sońyna deıin 2020-2025 jyldarǵa arnalǵan ındýstrııalandyrý baǵdarlamasyn bekitemiz. Indýstrııalyq-ınnovasııalyq damý tujyrymdamasyna engizilgen bul baǵdarlama ótken jyldyń jeltoqsan aıynda Úkimettiń qaýlysymen bekitildi. Baǵdarlamanyń maqsaty óńdeýshi ónerkásiptiń halyqaralyq básekege qabilettiligin arttyrý. Jalpy, ındýstrııalyq-ınnovasııalyq saıasat jalǵasa beredi. Eksportqa baǵdarlanǵan kásiporyndar men eńbek ónimdiligin arttyrýǵa basa nazar aýdarylady, – dedi mınıstr orynbasary.
О́z sózinde vıse-mınıstr taıaýda bekitiletin 2020-2025 jyldarǵa arnalǵan ındýstrııalandyrý baǵdarlamasynyń negizgi erekshelikterin atady. Birinshiden, óńdeýshi ónerkásiptiń barlyq salalaryndaǵy tıimdi jumys istep jatqan kompanııalardy qoldaý úshin baǵdarlamadaǵy salalyq basymdyqtar alyp tastalady. Ekinshiden, bıýdjet qarajatyna baqylaýdy kúsheıtý jáne tıimdi paıdalanýyn qadaǵalaý úshin kásiporyndardy qoldaýda naqty kórsetkishterge kóńil aýdarylmaq. Úshinshiden, kásiporyndardy jańǵyrtý men tehnologııalyq damytýǵa baǵyttalǵan qoldanystaǵy quraldar jetildiriledi. Amanııaz Erjanovtyń aıtýynsha, qazirgi tańda baǵdarlama jobasy ázirlenip jatyr.
Jeńil avtokólik óndirisi 41,5 %-ǵa ulǵaıdy
Vıse-mınıstrdiń atap ótkenindeı, avtokólik qurastyrý salasy eldegi mashına qurastyrý salasynyń negizgi baǵyty bolyp tabylady. Bul salany damytý arqyly ekonomıkanyń ózge de salalary mýltıplıkatıvti túrde damıtyny anyq. Sonymen qatar salanyń qarqyn alýy jańa jumys oryndarynyń ashylýyna da tikeleı yqpal etpek. Qazirdiń ózinde bul salada jumys isteıtinder sany 2 myńnyń aınalasynda bolsa, ónerkásiptiń aralas salalaryndaǵy jumys oryndarynyń sany 7 myń adamǵa jetedi.
– Qazir Qazaqstanda avtokóliktiń barlyq túrlerin jınaý boıynsha óndiris quryldy. 2018 jyldyń qorytyndysy boıynsha mashına jasaý salasyndaǵy avtomobıl jasaý úlesi 19,2 paıyzdy qurady. Al 2019 jyldyń qańtar-mamyr aılarynda mashına jasaý salasyndaǵy avtokólik shyǵarý úlesi 25,4 paıyzǵa deıin ósti. 2018 jyly jalpy quny 205 mlrd teńge bolatyn 32 298 kólik qurastyryldy. Mashına jasaý salasynyń naqty kólem ındeksiniń kólemi 2018 jyly 114 paıyzǵa jetti. Osy jyldyń 5 aıynyń qorytyndysy boıynsha jalpy quny 114 mlrd teńgeniń
16 921 kóligi shyǵaryldy. Jeńil avtokólik óndirisi 41,5 paıyzǵa, avtobýs óndirisi 3,2 esege, júk avtokólikteri óndirisi 35 paıyzǵa, tirkemeler men jartylaı tirkemeler óndirisi 35 paıyzǵa ósti, – dedi mınıstrdiń orynbasary.
Elektromobıl ınfraqurylymy salynýda
Baspasóz máslıhatynda Amanııaz Erjanov:
– Qazir barlyq sheteldik kompanııalar elektrokólik óndirisine kóńil aýdaryp jatyr. Bul álemdik trend. Biz odan qalyp qoımaýymyz kerek. Elektromobıl qurastyrýmen aınalysatyn birneshe qazaqstandyq kompanııany ataǵan edim. Ázirge qazaqstandyq óndirýshiler shyǵaratyn elektrokólikterdiń quny Tesla kólikterinen 1,5 ese qymbat bolyp tur, – deedi. Vıse-mınıstr búginde álemde osy sala boıynsha Tesla-nyń kóshbasshy ekenin aıta kelip, bizdiń avtokólik óndirýshilerimizdiń atalǵan kólikti zerttep, ózimizdiń ónimderdiń qunyn tómendetý tásilderin oılastyryp jatqanyn tilge tıek etti.
– Tesla kólikteriniń baǵasy 28 myń AQSh dollary shamasynda. Otandyq kompanııalar elektrokólikterge qoldanylatyn batareıalardy óz elimizde shyǵarý úshin jumys istep jatyr. Otandyq ǵylymı ınstıtýttar da atalǵan batareıany Qazaqstanda jasaý jaǵyn oılastyrýda. Batareıany shyǵarýǵa qajetti shıkizat bizde bar,– dedi Amanııaz Erjanov.
Mınıstr orynbasarynyń aıtýynsha, suranys bolǵan jaǵdaıda otandyq kompanııalar elektrokólik shyǵarýǵa daıyn kórinedi. Buǵan deıin birneshe avtokólik qurastyrylyp, satylymǵa shyǵarylypty. Qazir Nur-Sultan, Almaty qalalarynda jáne Nur-Sultan-Shýche tas jolynda elektrokólik ınfraqurylymy jasalyp jatyr. Búginde elimizde shamamen 200 elektrokólik bar.
Baýyrjan MUQAN,
«Egemen Qazaqstan»
