«Kóshbasshylyq» kitabynyń tanystyrylymy tusaýkeserden góri paıdaly keńeske toly qyzyqty trenıng sekildi ótti, sebebi qazaq qoǵamynda kóp zerttelmegen, sanada qalyptasa qoımaǵan, áli de tyń kúıinde kele jatqan kóshbasshylyq taqyrybynyń túıini osy salada júrip shyńdalyp, naqty jetistikke jetken avtordyń óz áńgimeleýinde senimdi tarqatyldy.
Almatydaǵy Ulttyq kitaphanada jańa kitaptyń tusaýyn kesýge qatysqan Qazaqstan Prezıdentiniń keńesshisi Maqsat Sqaqov kóshbasshylyq máselesin qazaqtyń ulttyq tanymymen baılanystyra qarastyryp, keshegi qol bastaǵan handar men sóz bastaǵan bılerdiń iri sóılep, kesek týraǵan mineziniń búgingi zamanaýı serkelerdiń qasıetimen jalǵasyp jatýynda bul ónerdiń tól tirshiligimizben bite qaınasqan tamyrlastyǵy bar ekenin aıtty.
Kóshbasshylyq psıhologııasyn, jetistik syryn zertteý ıdeıasy avtor Amerıkada oqyp júrgen kezinde týyndaǵan. Sh.Jumabekulynyń aıtýynsha, Amerıkanyń 1-2 synyp oqýshylary mektepte júrgende-aq kóshbasshylyq týraly sabaq ótedi. Quramyna kishkentaı memleketterdiń úlken shoǵyryn jınaǵan keshegi Keńes Odaǵynyń kemshiligi, kóshbasshylyq taqyrybymen ǵylym retinde múlde aınalyspaǵan bolsa, batys qoǵamy, ásirese Amerıkada bul máseleni zertteý óte keń damyǵan. Oqyp otyrǵanda birden eliktirip áketetin, durystyǵyna ılandyratyn, paıdasy zor kitaptardy elge kelgen soń aýdaryp, kópshilik oqyrmanǵa tartý etkisi kelgen maqsatyn avtor sol kezde belgilegen.
Amerıkada kóshbasshylyq týraly 7500 kitap jaryqqa shyqsa, jalpy álemde aǵylshyn tilinde ártúrli ataýmen 2,5 mln-ǵa jýyq eńbek jarııalanǵan. Munyń bárin aýdaryp shyǵý múmkin emes, sol sebepti avtor «Nıý-Iork Taımstyń» bestselleri», «Amazon» jáne «Bıtrıks» atty oqyrmandardyń eń úlken elektrondy alańy arqyly úzdik on kitapty tańdap, bir eńbektiń ishine jınaqtap usynýdy jón kóredi. Kitap kóshbasshylyq týraly zamanaýı zertteýlerdiń negizin salýshy Ýorren Bennıstiń «Kóshbasshy bolý haqynda» atty eńbeginiń aýdarmasymen bastalady. Ý.Bennıs aıtady: «E.Hemıngýeı aıtqandaı, álem bizdi talqandap tastaıdy, al biz úıindilerdiń arasynan kúsheıip qaıta turamyz. Bul sóz kóshbasshylarǵa da qatysty.
Kitap ýaqyt synynan ótip, adamzat oıynyń altyn qazynasyna aınalǵan tańdaýly týyndylardyń qaımaǵyn qalqyp alyp, qysqa da nusqa formatta mazmundap, oqyrman aldyna tosady. Kóshbasshylyq týraly oıdy Sh.Muqan bylaısha túıindeıdi: «Lıderlik degen qasıet emes, ol – áreket. Bizdiń elde ara-tura qudyqqa balalar túsip ketip, maıyp bolyp, mert bolyp jatady. Balalar qulamaı turǵanda, ol qudyqtyń qasynan ári-beri talaı adam ótedi. Qudyqtyń qaqpaǵynyń joq ekenin baıqaǵan adam erinbeı toqtap, birden tıisti oryndarǵa habarlasyp, olar kelgenshe kútip turyp, qudyqtyń beti jabylǵansha basy-qasynda júrse, ol naǵyz – lıder. Bálkim, siz bıik qyzmettiń ıesi emes, qarapaıym adam bolarsyz, biraq siz tap sol jerde lıderlik tanyttyńyz. Ekinshiden, lıderlik – jaýapkershilik. Úshinshiden, ol – qatelikti moıyndaý, keshirim suraý mádenıeti».
Shaǵyn redaksııa ujymy daıyndaǵan kitaptyń bas redaktory, belgili jazýshy, aýdarmashy Turysbek Sáýketaev, al kitaptyń jaryqqa shyǵýyna qarjylaı qoldaý kórsetken kásipker Nurjan Áshirbekov. Naryqta orny oısyrap turǵan, bilýge tıis dúnıeler áli de kóp. Aldaǵy ýaqytta «Mazmundama» baspasy «Kóshbasshylyqpen» ǵana shektelmeı, «Ekonomıka», «Kelissózder», «Jetistik», «Otbasy», «Kemeldený», «Baılyq», taǵy basqa toptamalarmen qataryn qalyńdata túsýdi josparlap otyr. «Mazmundamanyń» maqsaty – qazaqy mazmundy keńeıtip, qundy ıdeıany qazyq etken TOP -10 serııasyn nazarǵa usyný.
