Q. Baedilov salyqtyq raqymshylyq júrgizý qaǵıdalary bekitiletin jáne jaqyn arada barlyq aýmaqtyq memlekettik kirister departamentteriniń nazaryna jetkiziletinin aıtty.
Qarjy vıse-mınıstri habarlaǵandaı, Jol kartasy bekitildi, onyń aıasynda memlekettik kirister organdary salyqtyq raqymshylyq júrgizý tártibi týraly halyq arasynda keń aýqymdy túsindirý jumystaryn júrgizledi, sonyń arqasynda árbir azamat bıylǵy jyldyń sońyna deıin eseptelgen ósimpuldardy alyp tastaý boıynsha osy naýqandy paıdalana alatyn bolady.
«2019 jylǵy 1 qańtardaǵy jaǵdaı boıynsha 1,4 mln jeke tulǵanyń jalpy somasy 20,9 mlrd teńgeni quraıtyn salyqtyq bereshegi bolǵan, onyń ishinde negizgi borysh - 14,3 mlrd teńge, eseptelgen ósimpuldar – 6,6 mlrd teńge. Salyq beresheginiń eń kóp somasy nemese 70% kólik quraldaryna salynatyn salyqqa tıesili. Jer salyǵy boıynsha bereshekke 12%, múlik salyǵyna 6,7% tıesili», - dedi Q. Baedilov.
Jyl basynan beri memlekettik kirister organdary jeke tulǵalarǵa salyqtyq raqymshylyq júrgizý úshin úlken daıyndyq jumystaryn júrgizdi. Atap aıtqanda, ýákiletti organdarmen derekter bazasyn salystyryp tekserý, sondaı-aq salyq tóleýshilerdiń derbes shottaryn ózektendirý maqsatynda esepteýlerdiń tolyqtyǵy men durystyǵyn anyqtaý úshin derbes shottardy túgendeý júrgizildi.
Qarjy vıse-mınıstri atap ótkendeı, osyǵan baılanysty osy raqymshylyqtyń mańyzdy sharasy - jeke kásipker bolyp tabylmaıtyn, biraq kásipkerlik qyzmetten týyndaıtyn salyqtar boıynsha bereshegi bar jeke tulǵalardyń salyqtyq bereshegin esepten shyǵarýǵa múmkindik berý.
«Bul jerde kórsetilgen bereshek 2002-2003 jyldary salyq organdarynyń jergilikti júıeden jalpy respýblıkalyq salyqtyq aqparattyq júıege (BSAJ) kóshýi kezinde paıda bolǵan. 2019 jylǵy 1 qańtardaǵy jaǵdaı boıynsha somasy 700 mln teńgege, onyń ishinde negizgi borysh - 400 mln teńge, ósimpul – 300 mln teńge bolatyn mundaı salyqtyq bereshek 16 myńnan astam jeke tulǵada bolǵan», - dep túsindirdi Q. Baedilov.
Jeke tulǵa salyqtar boıynsha negizgi qaryzdy tólegen jaǵdaıda ósimpul esepten shyǵarylady.
«Salyq tóleýshilerge bul úshin eshqaıda barýdyń qajeti joq, memlekettik kiris organdary kún saıyn jeke tulǵalardyń derbes shottarynyń jaı-kúıine monıtorıng jasaıtyn bolady jáne olar negizgi boryshty tólegen kezde ósimpuldy esepten shyǵarý týraly tıisti sheshim shyǵarady», - dep túsindirdi Qanat Baedilov jáne ol 2019 jyldyń 1 qańtaryndaǵy jaǵdaı boıynsha salyq bereshegi bar barlyq azamattary memleket tarapynan ósimpul retindegi sanksııalardy esepteýsiz salyq mindettemelerin oryndaý múmkindigin paıdalanýǵa shaqyrdy.
