Qyzylorda oblysy ákiminiń orynbasary Baqytjan Namaev GIZ «Ortalyq Azııadaǵy sý resýrstaryn transshekaralyq basqarý» baǵdarlamasynyń basshysy Karolına Mılov pen Halyqaralyq Araldy qutqarý qorynyń QR-daǵy Atqarýshy Dıreksııasynyń dırektory Bolat Beknııazben kezdesip, Syr óńiriniń ekologııalyq jáne áleýmettik-ekonomıkalyq problemalaryn sheshýge qosqan eleýli úlesteri úshin alǵysyn bildirdi.
«Kókaral bógetinde balyqty qorǵaý qurylǵysynyń bolmaýyna baılanysty jyl saıyn balyqtar jappaı qyrylýda. Sonyń saldarynan 2017 jyly 200 tonna balyq shabaqtarynyń qyrylýy oryn alǵan. Sol sebepti «Soltústik Aral teńiziniń balyq qoryn saqtaý, qorǵaý jáne ony damytý. Aral-Syrdarııa Basseındik keńesiniń áleýetin arttyrý» jobasy aımaǵymyz úshin asa mańyzdy. Bizdiń yntymaqtastyǵymyz aldaǵy ýaqytta da tabysty bolyp, ekologııalyq jaǵdaıdy jaqsartýda jáne aımaq turǵyndarynyń ómir súrý sapasyn arttyrýda qajetti nátıjelerge qol jetkizetinimizge senimdimiz», dep atap ótti B. Namaev.
Jobanyń negizgi maqsaty Soltústik Aral óńiriniń balyq qorlarynyń qaýipsizdigin qamtamasyz etý, saqtaý jáne damytý, sý resýrstaryn ıntegrasııalanǵan basqarý prınsıpterin odan ári damytý jáne tájirıbege engizý, sý sharýashylyǵy jáne basseındik qurylymdardy materıaldyq-tehnıkalyq qamtamasyz etý deńgeıin jasqartý, Aral-Syrdarııa basseındik keńesiniń (shaǵyn basseındik keńesterdi qosa alǵanda) áleýetin arttyrý, qyzmetin jandandyrý, sondaı-aq halyqtyń ekologııalyq saýattylyǵyn joǵarylatý jáne joba aıasynda tıimdi yntymaqtastyq ornatý bolyp tabylady.
Memorandýmǵa sáıkes, Halyqaralyq Araldy qutqarý qorynyń QR-daǵy Atqarýshy dıreksııasy balyq qorǵaý qondyrǵysynyń jobalyq-smetalyq qujattamasyn ázirleıdi, Germanııa qoǵamy jobany qarjylandyrýmen aınalysady, al oblys ákimdigi jobany iske asyrýdy qoldaý sharalaryn jáne aqparattyq súıemeldeýdi qamtamasyz etedi.
