Munda muraǵattardy saqtaý men ony kelýshilerdiń nazaryna usynýǵa qatysty barlyq jaǵdaılar bar. Mýzeı qoryndaǵy eksponattardyń jalpy sany 1000-nan asyp túsedi. Bulardyń qataryn mınerologııa boıynsha jınaqtaǵan qundy kolleksııalar jáne paleontologııa, botanıka, arheologııa, dekorotıvti-qoldanbaly óner, nýmızmatıka, sırek kezdesetin kitaptar, arhıv qujatary men fotomaterıaldar quraıdy. Sondaı-aq ekspozısııa tizimindegi aıyryqsha oryndardyń birin zergerlik uıymdardyń teńdessiz kompozısııalary alady.
Taıaýda rýhanı ortalyq arnaıy jasaqtalǵan taǵy da 8 zalmen tolyqtyryldy. Iаǵnı kelýshiler úshin «arheologııa», «etnografııa», «Aqtóbe aımaǵynyń tarıhy», «Erlik pen dańq», «Táýelsizdik joly», «Qazaq handyǵy», «Altyn» jáne «Tabıǵat» zaldary ashyldy. Sonymen birge qosymsha bilim berý isine qatysty arnaıy alań jasaqtalǵan. Restovrasııalyq qalpyna keltirý ortalyǵy men kórkem sheberhana iske qosylǵan. Oqyrmandar zalyn qosa eseptegendegi ǵylymı kitaphana men qor saqtaý orny da mýzeıdiń mazmunyn tereńdete túsedi. Jańadan ashylǵan zaldardy mundaǵy ǵylymı qyzmetkerler almatylyq sýretshi-dızaıner mamandarmen birlesip jabdyqtaǵan. Túıip aıtqanda ólke tarıhynyń ejelgi tas dáýiri tusynan búgingi kezge deıingi kelisti kórinisteri eshkimdi de enjar, selsoq qaldyra almaıdy. Onyń bárin de shyǵarmashylyq ushqyr oılardyń belgileri atoılap tur. Joǵaryda kórsetilgen zaldarǵa kirgen ár adam belgili bir dáýir men tarıhı kezeńniń qoınaýyna kirip ketkendeı áserde qalady. Iаǵnı onyń ár qaısysy ejelgi ómir súrý saltyna tán joralǵylar, sol kezdegi kıim úlgileri, turmys pen mádenıet belgileri boıaýyn buzbaı kórinis tapqan.
Aıtalyq arheologııa zalyna qoıylǵan jádigerler jóninde sóz saptasaq, tutastaı elimizdiń batys óńiriniń arheologııalyq erekshelikterin kózdiń maıyn tamyza otyryp zerttegen arheologtardyń tyndyrǵan isterinen habar alasyz. Olardyń sýretteri men tutynǵan quraldaryn ózara úılestirip ornalastyrýda da uqypty qoldyń izderi aıqyn kórinedi. Atalǵan zaldyń kóshin tas pen mamont dáýiri bastap tur.
Bul ýaqyt bizdiń zamanymyzǵa deıingi 2500 jyldy qamtıdy. Mundaǵy turmystyq zattar da sol dáýirdiń ereksheligine sáıkes keledi. Zal ólkeniń ejelgi dáýiri men búginin toǵystyryp, ǵasyrlar aralyǵyndaǵy tarıhyn kelýshilerdiń kóz aldyna bere alady deıdi mýzeıdiń ǵylymı qyzmetkeri Aınur Maqsatqyzy. Zalǵa óńirdegi arheologııalyq qazba jumystary kezinde tabylǵan kúmis belbeý men altyn buıymdar jáne kúmis teńgeler árkimniń kózine basylatyny anyq. Sondaı-aq arheologııa zalynyń qundylyǵyn ejelgi kóshpendiler mádenıetine tıesili sharýashylyq jáne turmystyq buıymdar men XV-XIX ǵasyrlar aralyǵynda ómir súrgen tarıhı tulǵalarǵa qatysty derekter men tyń málimetter kóterip tur.
«Altyn» zalyna qymbat tastar men metalldan jasalǵan buıymdar qoıylǵan. Onyń bári qoınaýy qut Aqtóbe topyraǵyna qazba jumystaryn júrgizý kezinde tabylǵan deıdi mýzeı qyzmetkerleri. Al «Tabıǵat» zalynda mýzeıge kelýshiler Aqtóbe aımaǵyndaǵy flora jáne faýna álemimen, ıaǵnı janýarlar men ósimdikter dúnıesiniń tylsym syrymen tanysa alady. Jer betinde alǵashqy tirshilik etken janýarlardyń bir ókili mamont desek, mýzeı muraǵaty dál osy tustan beınelengen. Sondaı-aq «Táýelsizdik joly» zaly óz ataýynan kórinip turǵanyndaı táýelsizdiktiń eleń-alańynan bastaý alatyn elimizdegi san alýan ózgerister men jetistikter jónindegi derekter men dáıekterge toly.
Aqtóbe óńiriniń ótkeni men búgini, tarıhy men shejiresi jańa tarıhı ólketaný mýzeıine qoıylǵan mol mura, asyl qazynalarmen shektelip qalmaıdy. Sondyqtan da qazirgi kúni mundaǵy uıymshyl uıym mýzeı qoryn ólke tarıhynyń jańa betterin ashýǵa septigi tıetindeı eksponattarmen tolyqtyra túsýge bir kisideı jumylǵan.
