Belgili jýrnalıst Erlan Bekhojın bastaǵan shyǵarmashylyq toptyń taqyrypty ashýǵa talpynyp kóp izdengenderi kórinip tur. Taspaǵa túsken álemdik tulǵalar tolǵanysy, tolyp jatqan derekter men dáıekter bizdiń táýelsiz memleketimizdiń durys jolmen damyp, órkenıet kóshinde óz úlgisin qalyptastyrǵanyn alǵa tartady.
Iá, Qazaqstan órkendi ózgeristerdiń órisine aıaq basty. Eldiń jańa Prezıdentin saılady. Halqymyz taǵy bir tańdaýyn jasap, ózderiniń osy ýaqytqa deıingi ulaǵatty ustanymdarynan aınymaıtynyn tanytty. Egemendik tusynda Elbasy qalyptastyrǵan jaqsy dástúrlerdiń jalǵasýyna múddeli ekendikterin jarııa qyldy.
Sóıtip talaılardyń sanasyn san saqqa júgirtken máseleniń núktesi qoıyldy. Kezinde árıne ártúrli alyp-qashpa áńgimeler aıtylǵanyn bilemiz. Biraq Nursultan Nazarbaev qaı kezdegideı naǵyz kóshbasshyǵa tán kóregendikpen kúrdeli istiń kúrmeýin tappasa tarıhta qaıtalanbas qaıratker bolyp qalmas edi.
Muny osy fılmde oılaryn ortaǵa salǵan halyqaralyq spıkerler de atap ótipti. Solardyń keıbir sózderin keltire ketken jón sekildi.
Frans Vranıskıı, Aýstrııanyń 1986-1997 jyldardaǵy federaldyq kansleri:
– О́mirlik tájirıbe kórsetkendeı, kóptegen lıderler úlken tóńkeristiń nátıjesinde taqtan taıyp jatady. Bul zańsyz úrdis bolǵandyqtan álbette, úreı týdyrary anyq. Prezıdent Nazarbaevtyń óz erkimen ókilettigin toqtaýy da ózindik bir «revolıýsııa». Alaıda ol zańdy túrde júzege asqan ári aınalasyndaǵylardyń alǵaýsyz súıispenshiligine bólenetin beıbit revolıýsııa.
Roza Otynbaeva, Qyrǵyz Respýblıkasynyń 2010-2011 jyldardaǵy prezıdenti:
– Bılikti beıbit jolmen berý – menińshe, Ortalyq Azııaǵa onsha tán emes tártip. El-jurtymyzdy teginde osyǵan úıretýimiz kerek.
Romano Prodı, Italııanyń burynǵy Premer-mınıstri:
– Eshbir saıasatker máńgilik emes. El tarıhy bizben bitpeıdi. Biraq keıbireýler osyny túsinbeıdi. Nursultan Nazarbaev bılik almasqanda bolatyn keleńsizdikterdiń aldyn aldy. Eger kóshbasshy otstavkaǵa ketip bara jatyp ta óziniń yqpalynan aıyrylmasa men ony danalyqtyń kórinisine balaımyn.
– Álemde Nursultan Nazarbaevtaı saıasat serkeleri saýsaqpen sanarlyqtaı ǵana. Ol batyl sheshim qabyldady. Men bul qadam óz qamyn emes, Qazaqstannyń bolashaǵyn oılaǵandyqtan jasaldy dep esepteımin.
Ekrandaǵy jyly lebizder legi osylaı jalǵasa beredi. Sóıleýshiler Elbasy Nursultan Nazarbaevtyń zamanymyzdyń zańǵar tulǵasy ekenin, Prezıdent Qasym-Jomart Toqaevtyń oǵan laıyqty izbasar bolatyndyǵyna, álemdik qoǵamdastyqtan oıyp otyryp oryn alǵan Qazaqstannyń aldaǵy ýaqyttarda da alǵan betinen qaıtpaı, qaryshty qarqynmen órkendeıtindigine senim bildiredi.
Sonymen búkil álem «Qazaqstannyń keleshegi qalaı bolady?»degen suraqqa jaýap alǵan syńaıly. Buǵan saıası baǵyttyń sabaqtastyǵy, eldegi ishki turaqtylyqtyń beriktigi kepildik bereri daýsyz.
Toqsan aýyz sózdiń tobyqtaı túıinin aıtsaq, elimizdegi saıası sabaqtastyq strategııasyn saralaǵan bul fılm kópshilik kózaıymyna aınalady degen úmittemiz.
