9 shildede Máskeýdegi «Zarıade» saıabaǵynan bastalǵan halyqaralyq avtokólik ekspedısııasyna qatysýshylar Qazaqstan shekarasynan ótip, Atyraý aımaǵyna keldi. Oblys ortalyǵyndaǵy Dostyq úıinde qonaqtardy shashý shashyp qarsy alǵan sharaǵa Atyraý oblysy Qazaqstan halqy Assambleıasy, «Qoǵamdyq kelisim» mekemesiniń ujymy, Atyraý qalalyq ákimdiginiń, buqaralyq aqparat quraldarynyń ókilderi, etnomádenı birlestik músheleri qatysty.
– Qazaq eliniń munaıly astanasy atanǵan Atyraýda 80-nen astam etnos ókilderi turady, 19 etnomádenı birlestik bar, – dedi Atyraý qalasy ákiminiń orynbasary Ulyqbek Tinálıev. – Bul avtosherýdiń maqsaty da elderdiń arasyn jaqyndatyp, halyqaralyq baılanysty nyǵaıtý. Osy maqsattaryńyzdyń oryndalýyn, qaıda barsańyzdar da joldaryńyz ashyq bolýyn tileımiz.
Ekspedısııaǵa qatysýshylar atynan sóz alǵan «Edınstvo» jýrnalynyń bas redaktory Aleksandr Shın: «Ekinshi dúnıejúzilik soǵys ýaqytynda, deportasııa kezinde koreı halqyn baýyryna basyp, jaqsylyǵyn aıamaǵan, tórinen oryn bergen qazaq eliniń darhan peıilin eshqashan umytpaımyz. Sol qazaqy qonaqjaılylyqty búgin de kórip, sezinip otyrǵanymyzǵa qýanyshtymyz. Sizderdiń aq kóńilderińiz jolymyzǵa tilekshi bolady degen oıdamyz. Uzaq saparǵa bet alǵan bizge degen qurmetterińizge alǵysymyz sheksiz», – dep rızashylyǵyn jetkizdi. Avtojoryqqa 10 kólik qatysady.
«Reseı halyqtarynyń Assambleıasy», jalpyreseılik qoǵamdyq uıymdardyń bastamasymen jolǵa shyqqan avtosherý Máskeý – Nur-Sultan – Tashkent – Ulan-Batyr – Phenıan – Beıjiń – Seýl – Máskeý baǵyty boıynsha júredi. Quramynda reseılik jáne koreılik qoǵamdyq uıymdardyń basshylary, saıahatshylar men blogerler, jýrnalıster, fotograftar bar ekspedısııa jeti memlekettiń 41 qalasynda bolady. Jetpis kún boıy jolda júrip, 15 qyrkúıekte Máskeýde aıaqtalatyn sapardyń sátti bolýyn tilegen atyraýlyqtar jolaýshylardy aq batamen shyǵaryp saldy. Alda olardy 30 000 shaqyrymǵa jýyq jol kútip tur.
