Jastar jylynyń aıasynda Qazaqstan Respýblıkasy Aqparat jáne qoǵamdyq damý mınıstrliginiń memlekettik grant sheńberinde «Azamattyq bastamalardy qoldaý ortalyǵy» KEAQ-nyń qoldaýymen «О́ńirlerde jastardy yntalandyrý jumysyn júrgizý úshin mentorlardyń 4 tobyn baryp oqytýdy uıymdastyrý» atty joba júzege asýda.
«Elordaǵa elimizdiń 4 aımaǵynan kelgen belsendi jastar, tálimgerlik tujyrymdamasyn úırenip, Qazaqstandaǵy tálimgerlik ınstıtýtynyń damýyn talqylaý úshin bas qosty. Jastar lageri 4 kún jumys istedi. Munda debattar, semınarlar, trenıngter jáne jetekshilermen kezdesýler ótti. Jobanyń maqsaty jastarǵa ómirlik óz joldaryn tabýǵa, kásibıligin arttyrýǵa, tulǵalyq damýy men ózin-ózi tanýlaryna mentorıng ádisi (tálimger) arqyly qoldaý kórsetý, mentor qyzmetin atqara alatyn ǵalymdar, kásipkerler, sarapshylar, joǵary jáne orta arnaýly oqý oryndarynyń oqytýshylary, kásiporyn jetekshileri, memlekettik qyzmetkerlermen ózara áreket etý jáne tájirıbe almasý ádisi arqyly qoǵamdaǵy tálimgerlikti damytý. Sonymen qatar joba jastardy tabysqa jeteleýge, yntalandyrýǵa, kásipqoı bolýǵa, quqyqtyq keńes berýge jáne tálimgerlerdiń kómegimen jeke basynyń damýyna yqpal etedi», deıdi uıymdastyrýshylar.
Oqytý jumystaryn tájirıbeli qazaqstandyq jáne halyqaralyq jattyqtyrýshylar men jastar kóshbasshylary ótkizedi. Olardyń qatarynda Ǵalııa Nurbekova, Madına Belıalova, Ǵanı Abadan, Ilıa Shmelev (Máskeý), Janna Ibraeva, «Astana TV» telearnasynyń telejúrgizýshisi Sandı Sultan jáne de Prezıdent janyndaǵy Memlekettik basqarý akademııasynyń oqytýshylary bar.
Is-shara barysynda ómirdiń tabysty traektorııasyn qurýda, mentorıng quraldary arqyly jeke damý men ózin-ózi aıqyndaýda jastarǵa qoldaý kórsetýdiń jańa múmkindikteri qarastyryldy, úzdik mentorlyq tájirıbelerdi paıdalaný jáne qurý máselesi talqylandy. Jobany iske asyrý sheńberinde «KAZBRANDS» QQ óńirlik kýratorlar men tálimgerler basshylyǵymen 4 óńirde 2 kúndik jastar kempteri uıymdastyrylatyn bolady. Bıylǵy qarasha aıyna deıin jastardyń túrli áleýmettik sanattary úshin dıalog alańdary, semınarlar, trenıngter, kezdesýler jumysy júzege asady.
Budan bólek, óńirlerde jastar boıynsha biryńǵaı aqparat jınaýǵa jáne jastar ÚEU arasynda keri baılanys berýge múmkindik beretin ınteraktıvti karta/platforma qurý boıynsha alda aýqymdy jumystar tur.
Raýan QAIDAR,
«Egemen Qazaqstan»
