Osy oraıda Aqtóbe oblystyq máslıhatynda qazirgi kezge deıin qalyptasyp úlgergen birqatar oń úrdister men tájirıbelerdi aıtqym keledi. Meniń oıymsha, bıýdjetti qabyldaý isine, onyń kirisi men shyǵysyn muqııat esepteýge uqypty kózqaras qalyptastyrý úlken jaýapkershilik ári senim. Sondyqtan máslıhat sessııasynda bıýdjetti qabyldap bekiter aldynda ony tereń súzgiden ótkizemiz. Bul úshin arnaıy jumys toby qurylǵan. Onyń quramyna qoǵamdyq uıymdar men qarjylyq organdardyń ókilderi jáne tekserý komıssııasynyń músheleri engen. Halqymyzdyń uǵym-túsinigine saı «jeti ret ólshep, bir ret kes» degen másele dál osy tustan bastaý alady. Sondaı-aq bıýdjetti qabyldaýǵa jáne bıýdjettiń shyǵystary men kiristerin esepke alýǵa arnalǵan oblystyq máslıhattyń sessııalary onlaın rejiminde ótkizilip, oǵan ashyqtyq pen jarııalylyq beriledi.
Osy máselege qatysty oblystyń ár turǵyny óz oı-pikirleri men usynystaryn jetkize alady. Sondaı-aq oblystyq máslıhattyń saıty arqyly da árqaısysy tıisti ún qosa alady. Bul oraıda biz eń aldyńǵy kezekte bıýdjet jónindegi qoǵamdyq keńestiń músheleri aıtqan qonymdy usynystar pen oı-pikirlerdi udaıy nazarda ustaýdy tájirıbege engizip kelemiz.
Soǵan qaramastan óńirde bıýdjet qarajattaryn tıimdi jumsaý isinde keıbir «áttegen-aılar» da kezdesip qalatynyn jasyryp qala almaımyz. Aıtalyq, jobalyq-smetalyq qujattar jasaý kezinde osyndaı ústirttikter oryn alǵany, sonyń saldarynan óńirdiń keıbir shalǵaı aýmaqtaryndaǵy áleýmettik nysandardyń durys jobalanbaǵany, ıaǵnı qajetsiz bos alańdar salynyp ketkeni sabaq alýǵa turarlyq jaıt dep bilemiz.
Bıýdjet tıimdiligin kóterý isine qarjylyq tártip pen onyń oıdaǵydaı saqtalýy septigin tıgize alady. Buǵan qosa taıǵa tańba basqandaı aıqyn josparlaý qajet. Sondaı-aq árbir bıýdjettik baǵdarlama boıynsha dál ekonomıkalyq esepter jasalmasa, bıýdjettiń tıimsiz tustary joıylmaq emes. Prezıdent Qasym-Jomart Toqaevtyń bıýdjet tıimdiligin kóterý jóninde qoıǵan mindetteri atalǵan máselelerdi naqty atqarýdy júkteıdi.
Bıýdjet qarajattaryn maqsatty jumsaý máselesinde belgilengen zańdylyqtardy buzý kórinisteri de kezdespeı turmaıdy. Mysaly, oblystyq máslıhattyń ótken sessııalarynyń birinde 2017 jyldyń bıýdjettik tapsyrmalaryn oryndaý kezinde osy sııaqty kórinister oryn alǵany tekserý komıssııasy tarapynan aıtyldy. Búginde onyń anyq-qanyǵy zerttelý ústinde. Túıip aıtqanda, bıýdjet qarajattarynyń únemdi jáne tıimdi jumsalýy alǵa damýdyń basty tutqalarynyń biri.
Sánııa QALDYǴULOVA,
Aqtóbe oblystyq máslıhatynyń hatshysy
AQTО́BE
