Memleket basshysy kúni keshe, ıaǵnı Ulttyq qoǵamdyq senim keńesi quramyn jasaqtaý aldynda Úkimet jumysyn bir pysyqtap, mınıstrlerdi serpiltip aldy. Osylaısha halyqtyń kókeıindegi, oıyndaǵy máselelerden qalys qalmaǵanyn, kerisinshe, jaǵdaıdy baqylaýda ustap otyrǵanyn kórsetti. Bul – ábden qııýy kelisken, ólshep-pishilgen durys qadam.
Jalpy, Ulttyq qoǵamdyq senim keńesiniń jumysy qoǵam úshin de, bılik úshin de kúrdelileý, jańǵyrý ýaqytynda bastalǵaly tur. Qazir qoǵamdyq-saıası úderister jedeldep, kópshiliktiń talaby da ózgerdi. Qoǵam bılikten eldegi qoǵamdyq-saıası úderisterdi belsendilikpen júrgizýdi talap etýde. Sondyqtan da Ulttyq qoǵamdyq senim keńesiniń jumysy barynsha ashyq, san salaly, memleketimizdegi barlyq qoǵamdyq kúshtermen dıalog arqyly júrýi tıis. Oǵan qosa, Ulttyq qoǵamdyq senim keńesi saılaý prosesin lıberalızasııalaýdyń tranzıtti kezeńindegi ótpeli qural dep qaraýǵa bolady.
Bul aspekt eldegi saıası prosesterdiń barlyq qozǵaýshy kúshi jınalatyn plıýralıstik jáne demokratııalyq Parlament jumysynyń basymdyǵyna aınalýy kerek.
Sonymen qatar eldegi saıası prosesterdiń geografııasyn keńeıtip, eldiń saıası ómirine barlyq óńirlerdi belsene qatystyrý qajet. О́ıtkeni Qazaqstandaǵy saıası prosester tym ortalyqtandyrylyp ketkendikten, azǵantaı tolqýlar da saıası júıeni táltirektetip jiberedi. Eger saıası prosester ortalyqtan alystatylsa, memleket bekemdene túsedi. Osy saıası prosesterdi ortalyqsyzdandyrý aıasynda elimizdiń barlyq óńirlerinde Ulttyq qoǵamdyq senim keńesi sııaqty keńester qurýdy usynǵan bolar edim. Bul qadam bıliktiń qoǵamdyq geografııany bóle-jarmaı paıdalanatynyn kórsetip, jergilikti ısteblıshmenttiń saıası mádenıetin kótere túser edi. Qazir bolsa óńirlerdegi saıası prosester qańtarýly tur.
Prezıdent Q.Toqaev atap ótkendeı, endigi jerde bıliktiń halyq aldyndaǵy jaýapkershiligi men eseptiliginiń tetikteri kúsheıtile túsedi.
