Konferensııada Qazaqstan, Qyrǵyzstan, Tájikstan, Túrkmenstan, О́zbekstan jáne Monǵolııadan kelgen BAQ tilshileri, azamattyq qoǵamnyń ókilderi, medıa salasyndaǵy halyqaralyq sarapshylar qazirgi ýaqyttaǵy ǵalamtorlyq tehnologııalyq ózgeristerge – aqparattardy jetkizýdiń sıfrlyq júıege ótýine baılanysty týyndap otyrǵan máselelerdi talqylady. Sondaı-aq konferensııa jumysyna Qyrǵyzstannyń Syrtqy ister, Mádenıet, aqparat jáne týrızm mınıstrlikteriniń ókilderi qatysty.
Negizgi baıandamany EQYU-nyń BAQ erkindigi máseleleri boıynsha ókili Arlem Dezır jasady. «О́tken jyly Nur-Sultan qalasynda bolǵan konferensııada biz Ortalyq Azııadaǵy buqaralyq aqparat quraldarynyń erkindigin talqylaǵan edik. Sońǵy mezgilde bul baǵytta jaǵdaıdyń jaqsarǵanyn biz baıqap otyrmyz. Degenmen, buqaralyq aqparat quraldaryn qorǵaýdyń qajettiligi bar», - dedi Dezır myrza. Ol óziniń aqparattyq saıttardyń qursaýlanýyna jáne jýrnalıstterdiń erkindiginiń shektelýine oraı birneshe ret Ortalyq Azııa ólkelerindegi memlekettik organdarǵa qaırylýǵa májbúr bolǵanyn belgilep ótti. «Ortalyq Azııa memleketteri EQYU-nyń músheleri bolyp sanalady, sondyqtan olar jýrnalıstterdiń erkindigin saqtaýǵa mindetti», - dep tujyrymdady sózin EQYU-nyń ókili.
Jıynda talqylanyp jatqan máselelerge óz pikirin bildirgen Qyrǵyzstannyń Mádenıet, aqparat jáne týrızm mınıstri Azamat Jamanǵulov ólkede sóz erkindiginiń edáýir jaqsy deńgeıde ekenin belgilep, ǵalamtor jelisinde jaǵymsyz úrdisterdiń jaralyp jatqanyn belgilep ótti. Atap aıtqanda, árqandaı feık (jalǵan) málimetterdiń jarııalanýy keńiri etek aldy. Jýrnalıstterdi orynsyz qaralaıtyn trolldar paıda boldy.
Qyrǵyzstannyń syrtqy ister mınıstriniń birinshi orynbasary Nýran Nııazalıevdiń aıtýynda, Qyrǵyzstan úshin de, shektes aýmaqtaǵy ólkeler úshin de jalǵan jańalyqtar jáne ǵadaýattar búgingi kúnde ǵalamtordaǵy kókeıkesti problemalar bolyp otyr.
Jıynda Ortalyq Azııanyń ár tarapynan kelgen BAQ ókilderi jáne sarapshylar óz ólkelerindegi aqparat taratýdyń jaı-kúıin baıandap, ony jaqsartýdyń joldaryn boıynsha pikirlerin ortaǵa saldy.
Tájikstandyq «Azııa plıýs» portalynyń dırektory Zebo Tajıbaeva óz ólkesinde ǵalamtorlyq aqparat bulaqtaryna shekteý kúsheıip jatqanyn habarlady. «Bul az bolǵandaı, VPNder (vırtýal jeke jeliler) de jabylýda. Tájrıbeli qoldanýshylar ártúrli baǵdarmalardy kóshirip alý arqyly aqparat alýǵa májbúr bolýda»,- dedi ol.
Ekikúndik konferensııada «BAQ-taǵy plıýralızmge sıfrlyq damýdyń áseri», «Onlaın-BAQ-ty retteý jáne pikir bildirý erkindigin qorǵaý», «Ortalyq Azııada pikir bildirý erkindigi salasyndaǵy úrdister», «Bosqyndar isteri - Rımdik hartııa jóninde málimdeý», «Aýmaqtaǵy BAQ erkindigi salasyndaǵy jaǵdaıdy sholý» jáne basqa taqyryptar boıynsha pikir alysý ótti.
Nazarbek BAIJIGITOV,
arnaıy «Egemen Qazaqstan» úshin.
Qyrǵyz Respýblıkasy, Bishkek qalasy
Sýretter avtordiki
