Jıynnyń basty taqyryby Úkimettiń keńeıtilgen otyrysynda memleket basshysynyń áleýmettik-eńbek salasy boıynsha bergen tapsyrmalaryn iske asyrý boldy. Jańa jumys oryndaryn qurý, mekenjaı áleýmettik kómegin berý, eńbek quqyqtaryn saqtaý máseleleri jóninde de sóz qozǵaldy.
Atyraý oblysy ákiminiń birinshi orynbasary Serik Shapkenov bıylǵy 1 sáýirden beri ókiletti organdarǵa AÁK boıynsha keńes surap 14 314 adam kelgenin atap ótti. Qazir aımaqta 32 670 adam (5 748 otbasy) mekenjaı áleýmettik kómegin alady.
Mınıstr Berdibek Saparbaev bıyl jastardy, múmkindigi shekteýli jandar men az qamtylǵan otbasylardy memlekettik qoldaý sharalarynyń aıasy keńeıgenin, Prezıdent tapsyrmasymen jeńildetilgen nesıe berý, úıinde isteıtin áleýmettik jumys oryndaryn ashý, bıznes negizderine, jańa mamandyqtarǵa oqytýǵa qosymsha 50 mlrd teńge bólingenin aıtty. Múmkindigi shekteýli jandardy ońaltýdyń tehnıkalyq quraldarmen tolyq qamtamasyz etilýi mańyzdy ekenine toqtalǵan mınıstr Aqtóbede «Áleýmettik qyzmetter portaly» qanatqaqty jobasy bastalǵanyn atap ótti. «Bul múgedek jandarǵa memlekettik satyp alýǵa qaramaı, qajetti tehnıkalyq quraldar men qyzmetterdi ózi, jeke erekshelikterin eskere otyryp alýǵa múmkindik beredi»,-dedi Berdibek Saparbaev. Mınıstr elimizdiń barlyq oblystarynda ońaltý ortalyqtary bolýy tıis ekenin aıtyp, endigi kezekte aýdandarda shaǵyn keshendi ortalyqtar ashylatynyn málim etti.
Keńeste, sondaı-aq, iri kásiporyn basshylaryna qyzmetkerleriniń eńbek quqyqtaryn saqtaý, qaýipsiz eńbek jaǵdaıyn qamtamasyz etip, qazaqstandyq jumysshylar men sheteldikterge birdeı jaǵdaı jasalýy kerektigi aıtyldy.
QR Eńbek jáne halyqty áleýmettik qorǵaý mınıstri jumys sapary kezinde Atyraýdaǵy áleýmettik qyzmetter ortalyǵy men halyqty jumyspen qamtý ortalyǵynyń qyzmetimen tanysyp, aımaqta atqarylyp jatqan isterge oń baǵa berdi.
ATYRAÝ
