Qazaqstan Respýblıkasynyń syrtqy saıasatynda eýropalyq elderdiń alatyn orny aıryqsha. Qazaqstan men Eýroodaq arasyndaǵy yntymaqtastyqty keńeıtý týraly kelisimdi iske asyrý úshin eýropalyq tarappen júıeli jumys isteýimiz qajet. Eýroodaqtyń Ortalyq Azııa boıynsha bıylǵy maýsymda qabyldaǵan jańartylǵan strategııasy seriktestikti nyǵaıtý úshin tyń múmkindikterge jol ashady.
Eýropalyq odaq – Qazaqstannyń iri saýda-ekonomıkalyq jáne ınvestısııalyq seriktesi. Elimizdiń syrtqy saýda aınalymynyń jáne Qazaqstan ekonomıkasyna tartylǵan tikeleı sheteldik ınvestısııanyń jartysy Eýropalyq odaq memleketterine tıesili. Osyǵan baılanysty, Qazaqstannyń Bolgarııa, Latvııa, Portýgalııa, Serbııa, Slovakııa jáne Estonııa elderindegi dıplomatııalyq mıssııalaryna tolyqqandy elshilik mártebesin berý – Eýropa memleketterimen ózara is-qımyldardy tereńdetýge baǵyttalǵan mańyzdy qadam.
Qazirgi ýaqytqa deıin osy elderde bizdiń dıpmıssııalarymyz ben konsýldyqtarymyz ǵana jumys istedi. Bul atalǵan memlekettermen ózara yntymaqtastyqty qarqyndy damytýǵa tolyq múmkindik bermedi.
Joǵaryda kórsetilgen memleketterdiń elshilikteri Qazaqstanda tıisti deńgeıde jumys isteýde. Osyǵan oraı bizdiń seriktesterimiz Nur-Sultan tarapynan laıyqty qadam jasalatynyna senim bildirgenderin atap ótý qajet.
Aýqymy jaǵynan shaǵyn elshilikterimizdi qarjylandyrý máselesi jumys istep turǵan dıplomatııalyq mıssııalardyń bıýdjeti sheńberinde qarastyrylǵan. Bul – álemdik tájirıbede bar tásil, ıaǵnı memleketter dıplomatııalyq ókildikterdiń yqsham, kásibı, tıimdi quramy negizinde sapaly ári nátıjeli qyzmetke basa nazar aýdarady. Osylaısha Qazaqstan Prezıdentiniń SIM usynysy boıynsha qol qoıǵan Jarlyǵy Eýropalyq odaqtyń mańyzdy seriktesterimen qarym-qatynastardy damytýǵa tyń serpin berý úshin qajetti ári oryndy sheshim boldy. Atalǵan bastama memleketimizdiń syrtqy saıası jáne syrtqy ekonomıkalyq qyzmetin ártaraptandyrýǵa arnalǵan mindetterdi júzege asyrýdy kózdeıdi.
Murat NURTILEÝOV,
Qazaqstan Respýblıkasy Prezıdentiniń kómekshisi
