A. Ospanovtyń aıtýynsha, Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrligi múddeli memlekettik organdarmen birlesip, bıznes-prosesterdi avtomattandyrý, jańǵyrtý jáne vedomstvoaralyq ózara is-qımyldyń tıimdiligin arttyrý esebinen memlekettik kórsetiletin qyzmetterdiń qoljetimdiligin arttyrý boıynsha turaqty negizde jumystar júrgizýde.
Bıylǵy sáýir aıynda Memlekettik kórsetiletin qyzmetter tizilimine 120-dan astam túzetýler engizildi. Qazirgi ýaqytta jańartylǵan Tizilimdegi memlekettik qyzmetterdiń sany -740.
Memlekettik qyzmetter turǵyndarǵa kelesi formatta kórsetiledi: elektrondyq formatta - 532 qyzmet (71,9%), qaǵaz formatta - 208 (28%), «Azamattarǵa arnalǵan úkimet» memlekettik korporasııasy arqyly 635 qyzmet (85,58%).«Eger memlekettik qyzmetterdi usynýdyń múmkin arnalary týraly aıtatyn bolsaq, búginde elektrondy formatta qyzmetter kórsetý boıynsha aýqymdy jumystar júrgizý qajet. Biz búginde memlekettik qyzmetterdi kórsetýdiń barlyq múmkin arnalaryn qamtamasyz etemiz: «egov.kz» elektrondyq úkimet portaly, sondaı-aq Telegram-bot, mobıldi qosymsha, Memlekettik korporasııa, memlekettik qyzmetterdi kórsetý konsýltasııalary máseleleri boıynsha biryńǵaı baılanys ortalyǵy jáne t.b. sııaqty memlekettiń halyqpen kommýnıkasııa arnalary», — dedi vıse-mınıstr.
«Egov.kz» elektrondy úkimet portaly arqyly tek birinshi jartyjyldyqta 23,5 mln qyzmet kórsetildi (2018 jyldyń alǵashqy jartyjyldyǵynda – 12,8 mln qyzmet), ósim 182% qurady.
2019 j. 1 shildedegi jaǵdaı boıynsha «Azamattarǵa arnalǵan úkimet» memlekettik korporasııasy arqyly 15 mln-nan astam memlekettik qyzmet kórsetildi. Búgingi kúni Qazaqstanda 329 HQKO bar, onyń ishinde 23 arnaıy HQKO (onyń ishinde 16-sy avtodromdarmen jaraqtalǵan), 17 Sıfrlyq qyzmet kórsetý ortalyǵy bar. Shalǵaı eldi mekenderdegi turǵyndarǵa memlekettik kórsetiletin qyzmetterdiń qoljetimdiligin qamtamasyz etý boıynsha mindetterdi oryndaý maqsatynda qazir 70 mobıldi top jumys isteıdi.
Jyl basynan beri 74 qyzmet boıynsha bıznes-prosester ońtaılandyrylyp, nátıjesinde kelesi kórsetkishterge qol jetkizildi:
- qyzmet kórsetý merzimin orta eseppen 10 kúnge deıin qysqartý, buryn qyzmet kórsetýdiń ortasha merzimi 19 kúndi qurady, ıaǵnı memlekettik qyzmet kórsetý merzimi 2 esege qysqardy;
- ıntegrasııa esebinen talap etiletin qujattardyń sany orta eseppen 3-4 qujatqa qysqardy, buryn 5-6 qujat talap etiletin;
- 37 qyzmet boıynsha keńse arqyly balamaly qyzmet kórsetý alynyp tastaldy;
- jańa 17 qyzmet qosymsha elektrondyq formatqa kóshirildi.
«Sonymen qatar memlekettik qyzmetterdi ońtaılandyrý jáne sapasyn arttyrý maqsatynda biz búginde memlekettik qyzmetterdi biriktirý boıynsha belsendi jumystar júrgizip jatyrmyz. Olar kompozıttik memlekettik kórsetiletin qyzmetter dep atalady. Búginde biz kompozıttik qyzmetterdiń tolyq tizilimin anyqtadyq jáne qazir búkil Tizilimnen 25 memlekettik qyzmetti usynýdy qarastyratyn 11 kompozıttik qyzmet iske qosyldy», — dedi A. Ospanov.
Konsýltasııalyq qyzmetterdiń taǵy bir arnasy – 1414 baılanys ortalyǵy. I jartyjyldyq qorytyndysy boıynsha Biryńǵaı baılanys ortalyǵyna júginýler sany 3,5 mln-ǵa jýyqtady.
Vıse-mınıstr habarlaǵandaı, «Sıfrlyq Qazaqstan» baǵdarlamasy aıasynda ıntellektýaldy konsýltant engiziledi, Chat-bot arqyly 200 myńǵa jýyq qyzmet úshin jaýap berildi.
