Bul Tuńǵysh prezıdentimiz Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan máselelerge sáıkes «Qazaqstannyń kıeli jerleri» jobasyn júzege asyrý maqsatynda qolǵa alyndy. Saıahatqa Amanqaraǵaı aýylynyń jastary shaqyryldy. Ormandy aýyldyń shyǵys jaǵynda shaǵyn tóbeshik batys jaǵynan jaqsy kórinedi de, shyǵysqa qaraı eńistenip baryp, etegi tegistelip ketedi. Bul oryn erteden Toıtóbe dep atalady. Tóbege shyǵyp, demalyp otyrǵannyń ózi adam janyna shıpa beretinin, sharshaǵany tez basylatynyn aıtady jergilikti turǵyndar. Olar bul jerde keremet emdeý ornyn ashýǵa bolatynyna senimdi.
Kitaphanashylar saıahatshylarǵa osy qasıetti jerdiń erekshelikteri jáne ólketanýshy Jamantaı Ýaqbaev týraly áńgimeledi. Ol kisi Amanqaraǵaı ormanynyń kıeliligi jaıynda halyq jadynda qalǵan qyzyqty ańyz áńgimelerdi jetkizýshiniń biri edi. Osy jerde Samarqand qalasynan oralǵan aqsaq Temir Toqtamysty jeńgen jeńisin toılaǵan eken. Ańyz boıynsha, ol 1391 jyly jazda bolǵan desedi. Bir apta boıy toılanypty. Al HIH ǵasyrda bul jerde Shoqan Ýálıhanovtyń ákesi Shyńǵys tóreniń aq kıiz úıi turdy. Ormannyń aýasy tunyq, jerden bir erekshe qasıet berip turǵandaı. Adam jany sergip sala beredi. Túrli shópterdiń jupar ıisimen rahattana dem alyp, eger aq qaıyńǵa jaqyndap kelseń sý syldyryn estýge bolady. Tómen qarasań aıaq astyndaǵy sańyraýqulaqtar jáne alýan túrli gúlder men shópterdi kóresiń. Tańǵajaıyp orynnan shyǵa bere kádimgi keń dalaǵa kezigesiń. Kitaphanashylar osy orynǵa birneshe ret kelip dertterinen aıyǵyp ketken jandardyń shynaıy oqıǵalary týraly áńgimeledi.
Saıahatqa qatysýshylar ólkemizde osyndaı kórkem jerdiń, ormannyń bolǵanyn maqtanysh tutatynyn jetkizdi.
