Jarqyn ómirge joldama
Qazaqtyń memlekettik áıelder ınstıtýtyn tuńǵysh ret bitirip, úlken ómirge mańyzdy joldama alǵan 71 qyzdyń biri – men. Baqytty ómirdiń shuǵylaly nuryna qol sozyp, bilim shyńyna umtylǵan keshegi arman búgin oryndaldy.
Joǵary bilim alǵan osy bizder, ózimizdiń analarymyzdyń keshegi qorlyq ómirin kórmeı óstik. Olardy muńdy zaryn, qaıǵyly ómirin ádebıetten, tarıhtan oqydyq, dombyra isheginen, qobyzdyń qylynan, arman degen ashy ánnen tyńdap, ishteı uǵyp, júrekten terbendik. Kúı qanatyn kúıik shalyp, kókeıkesti tilek, oıǵa, eń bolmasa súıgenine qoly jetpegen qyz syryn alystan tyńdap, jandaı uqtyq.
Solar kóksegen armanǵa sovet eliniń baqytty qyzdary, bizder erkin jettik. Joǵary dárejeli bilim aldyq. Búgingi qýanyshty kúnde bizdi osy dárejege jetkizgen kim edi? degen suraýǵa toqtalmaı bolmaıtyn sııaqty. Eń aldymen kimniń aty tabys pen jeńistiń, baqyt pen ómirdiń beınesi bolsa, asqan taýdan bıik aqyldy, teńizdeı shalqyǵan júrekti, aı nurly, kún sáýleli kósem ákemiz, baqytty balalyq ómirimizge altyn dáýren ornatqan Stalın esimi atalady.
Men ınstıtýttyń tarıh fakýltetin bitirip shyqtym. Meniń endigi jerdegi sanaly ómirim otanymyzdyń tarıhyn zertteý, marksızm-lenınızm ǵylymyn úırene berý isine, osy alǵan bilimge bilim qosý ústinde bolashaq urpaqtardy tárbıeleý isine arnalady. Sovet muǵalimi degen ataqty bárinen de joǵary ustap, saltanatty ómirde baqyt shyńyna, kommýnızm asqaryna órleı beremiz.
B.ISQAQOVA,
ınstıtýtty bitirýshi
