Al batyr jigittiń baıany munymen bitken emes. Adam janyn arashalaımyn dep arpalysyp júrgende, baltyryn ıtke qaptyrady. Basqa úıdiń «Bóribasary» bas salsa bir sári ǵoı, janǵan úıdiń ıti «jaǵalasqany» qalaı janǵa batpas?! Biraq áskerı ómir ábden shyńdaǵan Ádiljannyń jolyna bul jaıttardyń bir de bireýi toqtaý bola alǵan joq.
Alaýlaǵan qyzyl jalyn kórshi úıdiń shatyryna deıin sharpyp, ol jaqqa da kómek qolyn sozady. Keıinnen ótken jaıtty esine alǵan batyr jigit erliktiń eshqashan eseppen jasalmaıtynyn, sol sátte Alla taǵalanyń ózi boıyńa bula kúsh quıatynyn, sonyń arqasynda esh qorqynyshty sezbegenin alǵa tartty.
Dárigerlerdiń aıtýynsha, qutqarǵan jandardyń jaǵdaıy qazir qalypty kórinedi. Al áskerı qyzmetkerdiń ózin ıt qabýǵa qarsy ekpe salý úshin emhanaǵa áketipti.
Bizge belgili bolǵandaı, kapıtan Ádiljan Ákireev tórt bala tárbıelep otyrǵan jan. Ulttyq ulannyń 5572 áskerı bóliminde top komandıriniń orynbasary qyzmetin atqarady eken.
«Egemen-aqparat»
