Shyny kerek, alpys jylǵa jýyq kók bazardyń aldynda turǵan eskertkishtiń tozyǵy jetken. Biraq eski eskertkishti de qoqysqa laqtyryp tastaǵan eshkim joq. Tek ony qaıtadan jóndeýden ótkizip, tıisti jerge ornatýdyń múmkindigi qarastyrylyp jatqan bolatyn. Alaıda «Bitken iske synshy kóp» degendeı, Jambyl eskertkishi óńirdiń bas ǵımaratynyń aldyna ornatylǵan kúnnen bastap áńgime kóbeıdi. Bul bastamany quptaǵandar da, quptamaǵandar da tabyldy. Ásirese áleýmettik jelilerde Jambyl eskertkishine qatysty daý órshidi. Kóp jaǵdaıda jeli belsendileri eskertkishtiń óz ornynda qalýyn talap etip jatty.
Bul máseleniń dúbiri tek Jambyl óńirinde ǵana emes, respýblıka boıynsha da belgili boldy. Tipti keıbir azamattar bul máselege qatysty aqynnyń urpaqtary ne deıdi eken degen áńgimelerge de barǵan edi. Jýyrda jyr alybynyń shóberesi Murathan Jambylov óńirge kelip, oblys ákimi Asqar Myrzahmetovpen kezdesken bolatyn. Aqynnyń urpaǵy óz sózinde bul bastamanyń óte oryndy ekenin, sondyqtan da Jambyl áýletiniń atynan alǵys aıtatynyn jetkizdi.
Murathan Jambylov Taraz qalasyna alǵash ret jeti jasynda kelipti. Sodan keıin de joly túskende kelip júrgen. Ol óz sózinde kók bazar mańyndaǵy Jambyl eskertkishin alǵash kórgendegi esteligimen de bólisti. «Áli esimde, sonda eskertkishtiń aınalasy qujynaǵan halyq. Aldy kók bazar. Abyr-sabyr tańnan qara keshke deıin bir basylmaıtyn. Sonda eskertkishtiń kóleńkesinde esinen aıyrylǵansha ishimdik iship, kóleńkesinde uıyqtap jatqandardy da kórgenmin. Al qazir babamyzdyń eskertkishi óz ornyn taýyp, oblystyń bas ǵımaratynyń aldynda menmundalap tur. Bizge, baba urpaqtaryna budan asqan qandaı baqyt kerek», deıdi ol. Bul oraıda Jambyl oblysynyń ákimi Asqar Myrzahmetov te óziniń pikirin bildirdi. «Eger eskertkishtiń jaǵdaıy jaqsy bolsa, bútindi búldirip nemiz bar. Máselen, oblystyq qazaq drama teatrynyń aldyndaǵy Baýyrjan Momyshulynyń eskertkishi jaramdy bolǵandyqtan sol kúıinde «Jeńis» saıabaǵyna qoıdyq. Al Jambyl Jabaevtyń eskertkishiniń tozyǵy jetkendikten aýystyrýǵa týra keldi. Bul asyǵys jasalǵan qadam emes. Aldymen barlyǵy jan-jaqty zerdelendi», deıdi ákim.
El bolǵan soń túrli pikirler de bolady. Kezinde Amerıkanyń bir gazeti «Qazaqstan deıtin elde, Jambyl deıtin jerde asharshylyqqa arnalyp eskertkish qoıylypty. Qolynda qasyǵy bar bir shal alaqan jaıyp tur eken», dep jazypty degendi de estigenbiz. Sonda Jambyl aqynnyń qolyndaǵy dombyrany qasyq dep, qolyn sermep turǵanyn alaqan jaıyp tur dep jazypty degen de sóz bolǵan. Endi búginde Jambyl eskertkishine baılanysty mynadaı daý shyqty. Árıne, eskertkishtiń ornyn aýystyrǵannan eshteńe ózgermese de, eskini jańalaýdy quptaǵan jón. Endigi jerde bul daýdyń núktesi qoıyldy degen úmit bar.
