Qos taraptyq aýqymdy joba aıasynda ótken halyqaralyq ǵylymı-praktıkalyq semınarda agrotehparkiniń ǵylymı jumys baǵyttary, birlesken zertteýlerdiń nátıjesi, aýyl sharýashylyǵy daqyldarynyń jańa suryptaryn ósirý, aýdandastyrý máseleleri talqylandy. Jıynǵa Soltústik- Batys aýyl sharýashylyǵy jáne orman sharýashylyǵy ýnıversıtetiniń oqytýshylary, professorlar Zhan Zhengmao, Hu Yingang, Guo Dongwei, oqý oryndarynyń qyzmetkerleri men stýdentteri, jergilikti ǵalymdar, Nazarbaev Zııatkerlik mektebiniń ókilderi qatysyp, óz oılaryn ortaǵa saldy.
«Byltyr SQMÝ bazasy negizinde agrotehpark ashylyp, sheteldik jáne otandyq seleksııanyń aýyl sharýashylyq daqyldary egilip, synaqtan ótýde. Ondaǵy maqsat–sýyqqa, túrli ósimdik aýrýlaryna tózimdi, ónimdiligi joǵary bıdaıdyń jańa surybyn oılap tabý. Onymen agrotehnologııalyq fakýltet stýdentteri men oqytýshylar aınalysady», deıdi agrotehnıkalyq fakýltettiń dekany Altyn Shaıahmetova.
Keıin munda kartoptyń birneshe suryptary býdandastyrylatyn bolady.
Qytaılyq meımandar 5 gektar aýmaqqa ornalasqan agrotehparkti aralap, zertteý nátıjelerimen tanysty. Soltústik-Batys aýyl jáne orman sharýashylyǵy ýnıversıtetiniń professory Jang Djınmaonyń aıtýynsha, jobaǵa stýdentter men oqytýshylardyń qyzyǵýshylyǵy joǵary. Atqarylǵan sharýa qyrýar. 18 sort synalǵan. 13-i-ne teriskeıdiń klımatyna tózimdi degen baǵa berilgen. Kelesi jyly suryptardyń sany kóbeıtilmekshi.
6 jergilikti stýdent Soltústik-Batys ýnıversıtetinde oqyp kelipti. Qazirgi tańda agrotehnologııalyq fakýltettiń 1 magıstranty men 3 oqytýshysy Qytaıda tegin bilim alyp jatyr.
