Egemen elimizdi odan ári órkendetý men halyqtyń turmys deńgeıin jaqsartý, qoǵamnyń damýyna kedergi keltirip otyrǵan kesel – sybaılas jemqorlyqty joıý, kókeıkesti áleýmettik-ekonomıkalyq jáne eńbek qatynastaryna baılanysty máselelerdi sheshý baǵytyndaǵy ıgi ister men mańyzdy mindetterden kásipodaq ta tysqary qalmaıdy. Eki mıllıonnan astam múshesi bar qoǵamdyq uıym elimizdi jańǵyrtý baǵytyndaǵy aýqymdy jumystardyń bel ortasynda bolatyny sózsiz.
Kásipodaq – azamattyq qoǵamnyń negizgi tireginiń biri. Sondyqtan biz taıaý ýaqytta atqarylatyn aýqymdy jumystardyń oıdaǵydaı júzege asýy jolynda kúsh-jigerimizdi sarqa jumsaýǵa tıistimiz. Kásipodaq jumysshylardyń múddesi men quqyn qorǵaıtyn uıym bolǵandyqtan, jergilikti jerdegi eńbek ujymdarymen tikeleı jáne tyǵyz baılanysta, dıalog túrinde jumys isteýdi jalǵastyra beremiz.
Memleket basshysy Qasym-Jomart Toqaev Úkimettiń keńeıtilgen májilisinde de osy máseleni – bılik pen qoǵam arasyndaǵy dıalogty damytý qajettigin basa aıtty. Jańadan qurylǵan komıssııanyń da basty maqsaty osy. Bılik tarmaqtary elmen etene baılanysta bolýy tıis. Sonda ǵana halyqtyń jaǵdaıy men turmys-tirshiligin, áleýmettik máselelerin jan-jaqty bilýge múmkindik bolady. Eshteńeni jasyryp-jabýdyń qajeti joq. Ashyqtyq qajet. Shyndyq bar jerde senim bar. Halyq ózderi kótergen máselelerdi bıliktiń eskerýsiz qaldyrmaıtynyna shúbásiz senimde bolýy kerek.
Áleýmettik-eńbek qatynastaryna baılanysty máselelerdi ońtaıly sheshýdiń birden-bir joly – áleýmettik áriptestik. Oǵan keıingi jyldary naqty kóz jetti. Bul – jumys berýshiler, jumysshylar men memlekettik organdar arasyndaǵy eńbek jáne áleýmettik-ekonomıkalyq qatynastardy retteý máseleleri boıynsha múddelerdi kelistirýdi qamtamasyz etýge baǵyttalǵan ózara tıimdi qarym-qatynas júıesi. Osyndaı úshjaqty komıssııa respýblıkalyq, salalyq jáne aýmaqtyq deńgeıde bar. Respýblıkalyq úshjaqty komıssııanyń quramyna Qazaqstan Respýblıkasynyń Úkimeti, Kásipodaqtar federasııasy jáne «Atameken» Ulttyq kásipkerler palatasy engen. Al salalyq úshjaqty komıssııanyń quramynda tıisti mınıstrlik, salalyq kásipodaq, Ulttyq kásipkerler palatasy bar. Al aýmaqtyq komıssııa ákimdik, aýmaqtyq kásipodaq, jergilikti kásipkerler palatasy arasyndaǵy áleýmettik áriptestikti qalyptastyryp otyr. Sondyqtan osy baǵyttaǵy jumystardy odan ári jandandyrý – bizdiń basty maqsatymyz.
Baqytjan Ábdiraıym,
Qazaqstan Respýblıkasy Kásipodaqtar federasııasynyń tóraǵasy
