Ishki ister mınıstri Erlan Turǵymbaev málimdeýinshe, ınspektorlarǵa shabýyl jasaǵan qylmyskerlerdi anyqtaý jáne ustaý úshin elimiz boıynsha «Ustaý» jospary jarııalanǵan. Qoldaǵy derekter barlyq aımaqtarǵa jóneltilgen.
«Oqıǵa ornyna jaqyn ornalasqan Aqmola, Qostanaı jáne Soltústik Qazaqstan oblystarynyń jeke quramy dereý kúsheıtilgen qyzmetke kóshti. Oblystyq jáne respýblıkalyq mańyzy bar avtojoldarǵa blok-beketter qoıyldy, úsh oblystyń joldary boıymen jedel-izdestirý toptary jiberildi. Izdestirý jumystaryna IIM TJK tikushaqtary, IIM Krımınaldyq polısııa departamentiniń jáne «Arlan» arnaıy bólimshesiniń qyzmetkerleri qatysty», - dedi Ishki ister mınıstri Erlan Turǵymbaev. Josparlanǵan is-sharalardyń nátıjesinde kúdikti anyqtalyp, qamaýǵa alynǵan.
«Jedel-izdestirý sharalarynyń nátıjesinde Arqalyq qalasynyń turǵyny kúdikti retinde anyqtalyp ustaldy. Sondaı-aq, qylmys bolǵan tustan 20 shaqyrymdaı jerden «Nıva» markaly avtokólik tabyldy. Qazirgi ýaqytta kúdiktige qatysty tergeý amaldary júrgizilýde. Qylmys quraly men oq-dáriler tárkilendi. Birqatar krımınalıstik saraptamalar taǵaıyndaldy. Bul qylmysqa basqa da qatysýshylardyń bar-joǵy tekserilýde», dedi Ishki ister mınıstri Erlan Turǵymbaev.
Qoryqshy Q.S. Nurtazınovtyń ólimine jáne qoryqshy S.K. Ospanovty óltirý áreketine baılanysty QR QK-niń 99-baby, 2-bólimi boıynsha qylmystyq is qozǵalǵan.
Sonymen birge Ishki ister mınıstri Erlan Turǵymbaev ishki ister organdarynyń brakonerliktiń aldyn alý jáne jolyn kesý boıynsha atqaryp jatqan jumystary týraly habarlady.
Jyl basynan beri kıikterdi brakonerlik jolmen aýlaý faktisi boıynsha 37 qylmystyq is qozǵaldy, 32 adam ustaldy, 634 kıik múıizi,qylmys quraldary, sondaı-aq, 13 birli avtokólik jáne 19 - atys qarýy alyndy. Keltirilgen shyǵyn kólemi 1,3 mıllıard teńgeden asty.
«Brakonerlik úshin ákimshilik jáne qylmystyq jaýapkershilikti kúsheıtý, onyń ishinde múlik pen qylmys quralyn tárkileý týraly usynystar engizildi. Tabıǵat jáne jan-janýarlar álemine qatysty zańdardy buzýshylar keltirgen zııan úshin óndiriletin ótemaqy mólsherin arttyrý másele de pysyqtalýda. Orman sharýashylyǵy jáne jan-janýarlar álemin qorǵaý bólimsheleriniń kólikterin arnaıy jaryq jáne dybys sıgnaldarymen jabdyqtap, belgili bir túske boıaý máselesi ázirlendi», delingen habarlamada.
