Bıjamal Ramazanova ómirdiń buralańy, burylysy kóp joldan abyroımen ótken, ómirde qınalsa da syr bermegen, maıyssa da synbaǵan, tuǵyry bıik tulǵa. О́mirde kópti kórgen, kóp jaılardy oıyna túıgen onyń aq júrekpen aqtaryla aıtar áńgimesi az emes. Dara týǵan danalardyń biri Bıjamal anamyzdyń sondaı symbaty bólek sulý syrlarynyń bir parasy onyń «Daık Press» baspasynan kórgen, «Tarıhı kezdesýler» atty kólemimen ǵana emes, kórkemdiligimen de kórikti kitabynda toǵysypty.
Kitaptyń qurylysy da tapqyr túzilgen. Bul aıtary anyq, boıaýy qanyq derekti, kerekti kitap: «KSRO basshylyǵy jáne tanymal tulǵalar», «Qazaqstannyń kórnekti qaıratkerleri», «Qazaqstan qaharmandary», «Jazýshylar», «Kórnekti qaıratkerler» jáne «Ǵalymdar. Áriptester. Dostar» atty alty bólimnen turady. Kitaptyń mátinin baıandap, kóziqaraqty oqýshynyń ýaqytyn almaı-aq qoıalyq, sebebi ár bólimniń attary áńgimeniń kim, ne jaıly ekenin týaraı, shyǵar kúndeı aıqyn, anyq aıtyp tur. Ásirese, ózi júzdesken Nıkıta Hrýshev, Leonıd Brejnev, Vıacheslav Molotov, Iýmjagıın Sedenbal, Dinmuhammed Qonaev, Nursultan Nazarbaev, Ilııas Omarov syndy memleket qaıratkerleri, Baýyrjan Momyshuly, Raqymjan Qoshqarbaev, Saǵadat Nurmaǵambetov tárizdi qaharmandar; Muhtar Áýezov, Sábıt Muqanov, Ǵabıt Músirepov, Mırzo Tursynzade qatarly ádebıet alyptary; Patshaıym Tájibaeva, Zylıqa Tamshybaeva, Kúlásh Qunantaeva, t.b. dostary jaıly jazbalary, joǵaryda attary atalǵan tarıhı tulǵalardyń is-áreketteri, keıbiriniń osal tustary, Hrýshevtiń kúlkili áreketteri, barsha keıipkerlerdiń minezderi minsiz músindelgen.
Kitap avtory Bıjamal Ramazanova 12 jyl Qazaq KSR Joǵary Keńesi Prezıdıýmynyń hatshysy bolyp úlken memlekettik qyzmet istegen, Qazaqstannyń Azııa jáne Afıra elderimen Yntymaqtastyq komıtetiniń tóraǵasy bolǵan, uzaq jyldar boıy Almaty qalalyq ardagerler qoǵamynyń múshesi bolyp, el ómirine belsene aralasqan kórnekti memleket jáne qoǵam qaıratkeri. Muny tizbelep otyrǵanymyz ol óziniń jazbalarynda oıdan eshteńe qospaǵan, ózi kórgen, kýá bolǵan tarıhı tulǵalar men tarıhı oqıǵalardy qaz-qalpynda oıǵa qonymdy, aqylǵa syıymdy etip baısaldy baıandap bergen. Sonysymen de bul eńbek qundy. Álemdik deńgeıdegi asa kórnekti saıasatker Qasym-Jomart Kemeluly Toqaev 2003 jyly jaryq kórgen «О́mir men taǵdyr» atty kitabynda bylaı dep jazdy: «Ákemniń Joǵary Keńes Prezıdýımyndaǵy kóp jylǵy jumysy týraly aıtqanda, Bıjamal Ramazanova týraly aıtpaı ketý múmkin emes. 12 jyldan astam respýblıkanyń memlekettik bıligin kórsetetin osy óte mańyzdy organda ekinshi tulǵa boldy. B.Ramazanova – asa bilikti basshy, eńbekqorlyǵymen, sypaıylyǵymen áriptesterine degen dostyq nıetimen erekshelendi. Onyń Joǵarǵy Keńes Prezıdıýmynyń hatshysy qyzmetinen ketip, Qazaq KSR Mınıstrler Keńesi janyndaǵy Bas arhıv basqarmasyna basshy bolyp taǵaıyndalýy respýblıka bıligi úshin kemshin boldy. Ol Qazaqstandyq parlamentarızm tarıhyna jarqyn tulǵa bolyp endi».
Memleket basshysynyń tap basyp, tamasha aıtqan sózine alyp, qosarymyz joq.
Tobyqtaı sózdiń túıini – Bıjamal Ramazanovanyń toqsan jastyń tórinen tómenge, ótkenge kóz jibere turyp aıtqan maǵynaly sózi jasqa da, jasamysqa da oı salatyn tárbıelik máni zor, aıtary anyq, boıaýy qanyq ýaqytpen birge jasaı beretin asa baǵaly eńbek.
Sábıt DOSANOV,
jazýshy, Memlekettik syılyqtyń laýreaty
