Tutynýshylar múddesi eskerilmeıtini qalaı?
Seısenbi, 21 mamyr 2013 2:28
Monopolıster tyǵyryqtan shyǵý joly baǵany kóterý degen pikirge súıenýin qoıar emes
«SevKazEnergo» AQ-tyń jýyrdaǵy usynysy tutynýshylardyń tóbesinen jaı túsirgendeı boldy. Kún sanap órship bara jatqan qymbatshylyq saldarynan qaltasy da, júıkesi de ábden juqarǵan qarapaıym jurtshylyqtyń budan keıin qystan shyqqan kóterem maldaı elester hali monopolısterdi esh oılandyrmaıtyny, kerisinshe, súlikshe sorýyn údete túskeni shymbaıǵa batpaı qoımaıdy. Olar tarıfti kóterýdiń ońaı jolyna kóbirek den qoıyp, daıar asqa tik qasyq bolǵandy qolaı kóretin tárizdi.
Seısenbi, 21 mamyr 2013 2:28
Monopolıster tyǵyryqtan shyǵý joly baǵany kóterý degen pikirge súıenýin qoıar emes
«SevKazEnergo» AQ-tyń jýyrdaǵy usynysy tutynýshylardyń tóbesinen jaı túsirgendeı boldy. Kún sanap órship bara jatqan qymbatshylyq saldarynan qaltasy da, júıkesi de ábden juqarǵan qarapaıym jurtshylyqtyń budan keıin qystan shyqqan kóterem maldaı elester hali monopolısterdi esh oılandyrmaıtyny, kerisinshe, súlikshe sorýyn údete túskeni shymbaıǵa batpaı qoımaıdy. Olar tarıfti kóterýdiń ońaı jolyna kóbirek den qoıyp, daıar asqa tik qasyq bolǵandy qolaı kóretin tárizdi.
AQ basqarma tóraǵasynyń mindetin atqarýshy Alla Iаzovskaıa hanym qoǵamdyq tyńdaý barysynda 1 shildeden bastap jylý tarıfi 51,4 paıyzǵa ósetinin málimdep, aıdy aspannan bir-aq shyǵardy. Mundaı qadamǵa amalsyz baryp otyrǵandaryn aıtyp, qansha aqtalýǵa tyrysqanymen, baǵany sharyqtatýdyń sebep-saldary qoǵamdyq tyńdaý keńesiniń múshelerin ılandyra almady.
О́ndiristik shyǵyndardyń ár tarmaǵyn dáıektilikpen taldap, túsindirip bere almaǵannan keıin kúmán-kúdikpen qaraýshylar qatary seıilmeıtini zańdy. Búginge deıin qoldanystaǵy jylý qýatyn óndirý tarıfi 1377 teńge/gkal.-ǵa teń bolyp kelse, endi qosymsha qun salyǵyn qosqanda 2337,6 teńge/gkal-ny quramaq. Bul birden 710 teńge/gkal.-ǵa ósedi degen sóz.
Árıne, jumysshy-qyzmetkerlerdiń ortasha aılyq jalaqysyn 48 myń teńgeden 73 myń teńgege jetkizý, ol úshin 51 mıllıard teńge qajet degen nıet jaqsy-aq. Alaıda, mundaı suranys únemi tutynýshylardyń esebinen nege óndirilýi kerek degen zańdy saýal týady.
Oǵan aldymen kásiporynnyń ózi qyzyǵýshylyq tanytýy tıis emes pe? Bizdińshe, qymbattatý sharalaryn jarııalamas buryn ıgerilmeı jatqan rezervter men ishki múmkindikterdi elekten ótkizip alǵan jón bolar edi. Jasyratyny joq, óndiristik shyǵyndardy azaıtýdyń keshendi joldary, ınvestısııa tartý jaıy qanaǵattandyra bermeıdi. Jınaqtalǵan qarjynyń jumsalýynda ashyqtyq, móldirlik jetispeıdi. Jetkiliktiligine qaramastan jańa nysandar salýmen, ishi-syrtyn, basshylardyń kabınetterin eýropalyq úlgide bezendirýmen áýes.
Jıynǵa tóraǵalyq etken Tabıǵı monopolııalardy retteý agenttigi oblystyq departamenttiń dırektory Marat Mustafın mundaı asyra silteýge jol berilmeıdi dep qansha sendirgenimen, kóńilde kóp kúdik qaldy. О́ıtkeni, munyń aldynda «Qyzyljar sý» mekemesi sýmen jabdyqtaý júıesindegi normatıvtik-tehnıkalyq shyǵyndardy bekitý jobasyn usynyp, joǵarylatylǵan tarıf bekitilip kete barǵan. 70 paıyzdaıynyń ábden tozyǵy jetken 300 shaqyrymdaı sý qubyrlaryn jańartý tutynýshylar esebinen sheshilmeıtinin bile tura, ońaıdan olja tabýdy maqsat etken. Al paıdalanýǵa alynatyn sýdyń besten biri ysyrap bolyp, dittegen mejege jetpeı qalatyny onsha oılandyrmaıtyn tárizdi. Jumysshylardyń jalaqysyn eki ese kóteremiz degen ýáde de oryndalmaǵan kúıinde qaldy.
Qasqyrdyń yryldaǵany, jeımin degeni. Jeke-dara ústemdik qurǵan «SevKazEnergo» sekildi monopolıst kásiporynnyń aıtqandarynan qaıtpaǵan kúıi synyq-súıem sheginbeýlerine qaraǵanda degenderine jetpeı tynbaıtyn túrleri bar.
О́mir ESQALI,
«Egemen Qazaqstan».
Soltústik Qazaqstan oblysy.
