«SQ-Farmasııa» JShS basqarma tóraǵasynyń mindetin atqarýshy Berik Sháriptiń aıtýynsha, medısınalyq uıymdardan túsken qate ótinimderge baılanysty jetkizýde irkilisti boldyrmaý maqsatynda bıyl Biryńǵaı dıstrıbıýtor TMKKK aıasynda qyzmet kórsetetin medısınalyq uıymdarmen jarııa ofertany jasady.
«Oferta aıasynda túpkilikti ótinimderdi medısınalyq uıymdar qalyptastyrady. Biraq jóneltý bir ret málimdelgen kólemniń negizinde emes, naqty qajettilik pen tutyný jyldamdyǵy negizinde júzege asyrylady», dep túsindirdi «SQ-Farmasııa» basshysy.
Qazirgi tańda Biryńǵaı dıstrıbıýtor dári-dármekterge qosymsha qajettilikke arnalǵan ótinimderdi turaqty negizde qabyldap, óńdeıdi. Osy ótinimderdiń negizinde jóneltýge ruqsat qaǵazdardy resimdeıdi jáne soǵan sáıkes dári-dármekterdi óńirlerge taratady.
Biryńǵaı dıstrıbıýtordyń dári-dármek satyp alý jónindegi málimetine qaraǵanda, birinshi jartyjyldyqta ambýlatorııalyq pasıentterdi tegin qamtamasyz etý úshin eń kóp medısınalyq preparattar Almaty qalasynyń emhanalaryna kelip tústi. Almatyǵa shamamen 7,8 mlrd teńge somaǵa dári-dármek tıelgen, al pasıentter qazirdiń ózinde 5,3 mlrd teńgege tegin dári-dármek alǵan. Jyl sońyna deıin megapolıske medısınalyq uıymdardyń ótinimderi boıynsha 12,3 mlrd teńgeniń medısınalyq ónimi túsedi.
Kólemi boıynsha ekinshi tegin dári-dármek alǵan Shyǵys Qazaqstan oblysynda 9,8 mlrd teńgege tapsyrys berilgen. Iаǵnı jyldyq kólemnen 5,7 mlrd teńgege dárilik zattar alyndy. Osy óńirdegi emdelýshiler qazirgi tańda 5,3 mlrd teńgege tegin resept boıynsha dári-dármek aldy.
Elordalyq medısınalyq uıymdarǵa birinshi jartyjyldyqta 6,2 mlrd teńgelik jalpy jyldyq ótinimnen 5,6 mlrd teńgege tegin dári-dármek kelip tústi. Onyń ishinde 1 shildege deıin Nur-Sultan qalasynyń ambýlatorlyq emdelýshilerine 3,2 mlrd teńge kóleminde dári-dármek berildi.
5 mlrd teńgege dári-dármekter Qaraǵandy oblysyna, 4,4 mlrd teńgege Túrkistan oblysyna jáne 4,1 mlrd teńgege Almaty oblysyna jóneltildi. Qostanaı oblysy dıspanserlik esepte turǵan ambýlatorlyq emdelýshiler úshin 2,9 mlrd, Jambyl – 2,8 mlrd, Atyraý – 2,7 mlrd jáne Qyzylorda – 2,6 mlrd teńgege dári-dármek aldy. Batys Qazaqstan oblysy jáne Shymkent qalasyna dári-dármekter 2,5 mlrd, Soltústik Qazaqstan oblysyna – 2,4 mlrd, Aqmola oblysyna – 2,3 mlrd, Aqtóbe oblysyna – 2,1 mlrd, Pavlodar oblysyna – 1,8 mlrd jáne Mańǵystaý oblysyna 1,3 mlrd teńgege tústi.
Esterińizge sala keteıik, pasıentterdiń tegin dári-dármek alýyn baqylaý úshin Densaýlyq saqtaý mınıstrligi, Áleýmettik medısınalyq saqtandyrý qory, Respýblıkalyq elektrondy densaýlyq saqtaý ortalyǵy jáne «SQ-Farmasııa» turaqty negizde tegin dári-dármek alatyn pasıentterge reseptiniń nómiri men dári-dármek berý kúni týraly aqparaty bar SMS-habarlamalar taratady. Budan basqa, dári-dármekpen qamtamasyz etýde irkilis bolǵan jaǵdaıda emdelýshiler «SQ-Farmasııa» baılanys ortalyǵyna tegin 1439 qysqa nómiri boıynsha habarlasa alady.
