Aımaq basshysy aýdan ortalyǵy Aral qalasyndaǵy Aral balyq óńdeý zaýytyna bardy. Jergilikti tabıǵat paıdalanýshylarmen pikirlesti. Kásiporyn balyq ónimderin óndirýmen, qaıta óńdeýmen jáne satýmen aınalysady. О́nimderi Reseı, Polsha, Gollandııa, Germanııa jáne Avstrııaǵa eksporttalady. Atalmysh kásiporynda 40 jumys orny qurylǵan, maýsymdyq kezeńde 100 adamǵa deıin jumyspen qamtıdy. Zaýyt Ońtústik Koreıalyq tehnologııa boıynsha salynǵan, jylyna 6 myń tonna ónim óndiredi.
Sondaı-aq, oblys ákimi 6 balany tárbıelep otyrǵan kóp balaly ana Dıana Shúıinshalıevanyń úıine bardy. Aǵymdaǵy jyldyń sáýir aıynan bastap Dıana aı saıyn 154 739 teńge kóleminde ataýly áleýmettik kómek alýda. Ol kóp balaly otbasylarǵa qoldaý kórsetkeni úshin memleket jáne oblys basshylyǵyna alǵysyn bildirdi.
Budan ári oblys ákimi nevropatologııa, psıhologııa, defektologııa jáne massaj terapııasy boıynsha qyzmet kórsetetin «Qýanysh» jeke medısınalyq ortalyǵynyń ashylý saltanatyna qatysty. Ortalyqta múmkindigi shekteýli balalardy qaıyrymdylyq negizde tegin emdeý josparlanyp otyr.
Sonymen qatar, sapar barysynda Shıjaǵa eldimekeninde 100 oryndyq klýb ashylýyna qatysty. Onyń qurylysy 2018 jyldyń qarasha aıynda bastalǵan edi. Aımaq basshysy turǵyndardy jańa nysannyń ashylýymen quttyqtap, aýyl aqsaqaldarymen suhbattasty.
