Joba birneshe kezeń boıynsha júzege asady: baıqaýǵa qatysýshylardy tirkeý, irikteý, betpe-bet tildesý, bilim berý kezeńi jáne taǵylymdamadan ótý.
Jobanyń maqsaty – jastar arasynda memlekettik basqarý júıesi, bıznes jáne qoǵamdyq qyzmet salasy úshin qazirgi zamanǵy, tıimdi basqarýshylardyń jańa generasııasyn qalyptastyrý.
Nátıjesinde elimizdiń ár aımaǵynan 3 adamnan 51 jas irikteledi. 34 adam QR Parlamentinde, 17 adam ortalyq memlekettik organdar men ulttyq kompanııalarda taǵylymdamadan ótedi.
10 jyl ishinde jobaǵa 15 000-nan astam jas qatysqan. Olardyń 468-si konkýrstyq irikteýden, testileýden, oqý modýlderinen, QR Parlamentinen, ulttyq kompanııalardan, ortalyq memlekettik organdardan is-tájirıbeden ótken.
Jobaǵa 18-29 jas aralyǵyndaǵy Qazaqstan Respýblıkasy azamattary qatysa alady. О́tinimder www.jastar-rezerv.kz saıty arqyly 2019 jyldyń 26 shildesinen 5 qyrkúıeke deıin qabyldanady.
Konkýrsqa qatysýshylardy irikteýdi oblystyq jáne qalalyq máslıhat depýtattary, memlekettik organdar, qoǵamdyq uıymdar, BAQ jáne bıznes salasy ókilderi kiretin arnaıy komıssııalar júzege asyrady.
«Memleket basshysy Qasym-Jomart Toqaev óziniń saılaýaldy kampanııasynda atap ótkendeı, «bizdiń basty basymdyq – jastar úshin áleýmettik lıftilerdiń ashyqtyǵy men tıimdiligin qamtamasyz etý». Osyǵan oraı, bizdiń basty maqsatymyz – osy jobanyń kómegimen eldiń jas urpaǵynyń jaqsy áleýetine negizdelgen myqty rezerv qurý. Jastar ıgiligine baǵyttalǵan resýrstar osyndaı jobalar arqyly iske asyp jatyr», dep atap ótti «Bolashaq» qaýymdastyǵynyń atqarýshy dırektory Laýra Demesinova.
