«Jas kásipker» jáne «Bastaý bıznes» jobalary
Úkimet jetekshisi áleýmettik jobalardy iske asyrý aıasynda «Atameken» qoldaý ortalyǵy» mobıldi jumyspen qamtý ortalyǵyna, jumysshy mamandyqtaryna oqytý jónindegi oqý ortalyǵyna jáne «Jas kásipker» isin jańadan bastaǵan kásipkerlerge arnalǵan oqý ortalyǵyna bardy.
«Atameken» mobıldi jumyspen qamtý ortalyǵynyń qyzmeti jastardy kásipkerlik negizderine oqytýǵa jáne odan keıin jumyspen qamtýǵa baǵyttalǵan. Mobıldi ortalyqtar Nur-Sultan, Almaty jáne Shymkent qalalarynda ashylǵan, búginde 9 ortalyq jumys isteıdi, Qazaqstannyń barlyq óńirinde taǵy 30 ortalyq ashý kózdelgen. Premer-Mınıstr «Atameken» qoldaý ortalyǵy» jumyspen qamtý ortalyǵynda jeke isin ashýǵa nıet etip júrgen jas mamandarmen kezdesip, áńgimelesti.
Úkimet basshysy Tuńǵysh Prezıdent – Elbasy N.Nazarbaevtyń áleýmettik saıasaty aıasynda jáne Prezıdent Q.Toqaevtyń tapsyrmasy boıynsha Úkimet halyqtyń ál-aýqatyn arttyrýǵa baǵyttalǵan shuǵyl sharalar paketin ázirlegenin atap ótti. Osy jyldyń sońyna deıin 300 myńnan astam jas azamat jumyspen qamtýǵa kómektesý sharalarymen qamtylady. Sonyń ishinde «Bastaý Bıznes», «Jas kásipker» baǵdarlamalary aıasynda qysqa merzimdi kásiptik oqytý, startap jobalarǵa granttar men shaǵyn nesıeler berý arqyly qoldaý kórsetiledi.
Sondaı-aq Premer-Mınıstr tigin isine oqytatyn «DANMARD» oqý ortalyǵyna bardy. Atalǵan oqý ortalyǵynda oqý kezeńi – 3 aı. Aı saıynǵy shákirtaqy 21 myń teńgeni quraıdy.
Premer-Mınıstr kásipkerlik negizderine oqytatyn «Jas kásipker» oqý ortalyǵynda jobaǵa qatysýshylar úshin bıznes-trenıng ótkizdi.
Oqý aıaqtalǵannan keıin jumyssyz jáne ózin-ózi jumyspen qamtyǵan jastar 500 myń teńgeden astam óteýsiz grantqa úmitker bola alady, sondaı-aq aıyna 19 myń teńge kóleminde shákirtaqy ala alady.
Búginde Qazaqstan kásiporyndarynyń negizinde 563 oqý ortalyǵy jumys isteıdi (elordada 50 oqý ortalyǵy), bolashaqta olardyń sanyn 1000-ǵa deıin ulǵaıtý kózdelgen.
2021 jyly paıdalanýǵa beriledi
Sondaı-aq A.Mamın Tuńǵysh Prezıdent – Elbasy N.Nazarbaevtyń tapsyrmasy boıynsha salynyp jatqan Nur-Sultan qalasyndaǵy Ulttyq ǵylymı onkologııalyq ortalyqqa bardy.
Úkimet basshysyna jańa ǵylymı onkologııalyq ortalyqty salý boıynsha jol kartasyn iske asyrý barysy týraly baıandalyp, ǵımaratty jobalaý syzbasy tanystyryldy. Ǵylymı onkologııalyq ortalyq astyńǵy qabatyn qosa alǵanda 6 qabattan turady. Ǵımarattyń jalpy aýdany 49 myń sharshy metrden, al qurylys aýmaǵy 16 myń sharshy metrden astam. Qurylysty 2021 jylǵy naýryzda aıaqtaý josparlanǵan.
Jańa ortalyqta qaterli isik aýrýlaryn anyqtaý men emdeýdiń aldyńǵy qatarly tehnologııalary paıdalanylady. Sonymen qatar osyǵan deıin qurylǵan kardıologııalyq jáne neırohırýrgııalyq klasterlerdiń tájirıbesin paıdalana otyryp, lazerlik, sáýlelik jáne jasýshalyq-ımmýndyq terapııa qoldanylady.
Búginde ýaqytsha ǵımarattar men qurylystardy salý, osyǵan deıin bolǵan ákimshilik-turmystyq nysandardy buzý, shuńqyr qazý, sý deńgeıin tómendetý, baǵanany qaǵý jumystary oryndaldy, sondaı-aq irgetasty qalaý jumystary bastaldy.
2018 jyly Úkimet medısınalyq qyzmetterdi usyný sapasyn jaqsartýdy jáne onkologııalyq dıspanserlerdegi jabdyqtardy jańartýdy kózdeıtin, 2018-2022 jyldarǵa arnalǵan qaterli isik aýrýlarymen kúres jónindegi keshendi jospardy qabyldady.
Buǵan qosa, nysandy aralaý barysynda jańa ǵylymı onkologııalyq ortalyq salý úshin jer telimin Nazarbaev Ýnıversıtetten respýblıkalyq menshikke berý máselesi de qaraldy.
JEO-3 qurylysyn tekserdi
Premer-Mınıstr jańa JEO-3 qurylysynyń barysyn, otyn-energetıka kesheniniń nysandaryn jańǵyrtý barysyn tekserdi.
JEO-3 qurylys alańynda Úkimet basshysyna JEO-3 qurylysynyń birinshi kezeńi qýattylyǵy 480 Gkal/saǵ bolatyn sý jylytatyn qazandyq salýdy qarastyratyny baıandaldy.
Nysan aýmaǵynda temir jol jáne avtokólik joldary, ákimshilik-turmystyq keshen ǵımarattary salyndy. Qazir negizgi jabdyqty avtomattandyrý jáne elektrlik bóligin montajdaý jumystary júrgizilip jatyr. Búginde nysannyń daıarlyǵy 70%-dy quraıdy.
JEO-3 qurylysy taıaý jyldary elordanyń batys bóliginde jylýǵa artyp kele jatqan suranysty qamtýǵa múmkindik beredi, sonymen qatar jeke óndirýshi qýatty jáne Nur-Sultan qalasyndaǵy otyn-energetıka kesheniniń jylý kózin aıtarlyqtaı ulǵaıtady.
Qurylys alańynda Premer-Mınıstrge áreket etip turǵan JEO-1 jáne JEO-2 energııa kózderin jańǵyrtý jáne gazdandyrý, energııa kesheniniń aldaǵy jylytý maýsymyna daıyndyǵy týraly aqparat berildi.
Úkimet basshysy elordanyń otyn-energetıka kesheniniń nysandaryn salý jáne jańǵyrtý boıynsha birqatar naqty tapsyrma berdi.
