«Eshki baqtym, eńirep baqtym» deıtin sóz bar. Otardyń aldyna túsip alyp, jaqsy jaıylym izdep jeldep ketetin eshki babyn tapsa, baıytatyn túlik. Ony Qazaly aýdany, Qashaqbaı Pirimov aýylynyń turǵyny Lázzat Beknazarova da rastaıdy. Ol asyl tuqymdy shveısarııalyq zaanen eshkisin baǵady. Áý basta aýylda qandaı bıznesten jaqsy paıdaǵa shyǵýdy oı eleginen ótkizgen kásipker sútti eshki alýdy oılaıdy. Buǵan «Bıznestiń jol kartasy-2020» bıznesti qoldaý men damytý memlekettik baǵdarlamasy muryndyq bolǵan.
Memleket jaqsy ınnovasııalyq bıznes-josparǵa tegin grant bóledi. Sol arqyly Lázzat 750 myń teńgege asyl tuqymdy zaanen eshkisiniń jeti tólin alady. Memlekettik baǵdarlamanyń tıimdiligi sol, qajetti jem-shóp alý úshin taǵy da qosymsha qarjy bóledi.
– Aýylda mal baǵyp ósken adamǵa eshki ósirý qıynshylyq týǵyzbaıdy. Bul eshkige kóńilimniń qulaǵany, ol basqa tuqymdastarynan súttiligimen erekshelenedi. Búginde medısına adam aǵzasyna eshki sútiniń paıdasy kóp ekendigin aıtyp jatyr. Sondyqtan da súti qymbat. Tutynýshylardyń kóp bolatyndyǵyn bilgendikten, oıymdy batyl júzege asyrdym, – deıdi kásipker.
Búginde eshkileri tóldep, basy kóbeıgen. Asyl tuqymdy eshki kúnine 3,5-4 lıtr sút beredi. Aýdanda lıtri 500 teńgege saýdalanǵanymen, Baıqońyr qalasynda myń teńgege jetedi. Endi Lázzat jınaǵan qarjysyna taǵy biraz eshki almaq nıette.
Eshki súti – kóp aýrýlarǵa em. Sútin úzbeı ishken talaı naýqas qulan-taza aıyǵyp ketipti. Sondyqtan da osy jumysynyń jemisti bolary kásipkerdi qanattandyryp otyr. Úıge túsetin tabys tek eshki sútinen ǵana quralmaıdy. Usaq mal ustap, sıyr sútiniń ónimin saýdaǵa shyǵaryp otyrǵan otbasy az ýaqytta turmysyn ońdap aldy.
«Eńbek etseń erinbeı, toıady qarnyń tilenbeı» dep abyz Abaı osyndaı rýhy myqty adamdarǵa aıtqan ba dep oılaısyń. Áıtpese, jumys joq degen syltaýmen ózin aldarqatyp, memlekettik kómekke qol jaıyp júrgen otbasylardyń da qolynan keletin kásip qoı. Tek talpynys, qajyrly eńbek kerek.
Qyzylorda oblysy
