Áıtse de udaıy kútim jasalyp, sýarý talaptary durys saqtalǵan jaǵdaıda qatań tabıǵı faktorlarǵa qaramastan aǵashtardyń jaqsy ósetini talas týǵyzbaıdy. Sondyqtan bıyl Aqtóbe qalasynda jasyl jelekti sýarýdyń jańa ádisin júzege asyrý qolǵa alyndy. Izraıl elinen jetkizilgen jańa tehnologııa tal-terekter men saıabaqtardy tamshylatyp sýarý ádisine negizdelýimen erekshelenedi. Bul isti oblys ortalyǵyndaǵy «KH Elmıra» kásiporny qolǵa alyp otyr.
Jańa tásildiń buǵan deıin qoldanylyp kelgen kóldetip sýarý júıesinen artyqshylyǵy kóp. Joba jetekshileriniń aıtýynsha, 70 metr tereńdikte ornatylǵan sorǵy avtomatty túrde iske qosylyp, aǵashtyń jáne kógaldaǵy balaýsa men gúlzarlardyń ýaqtyly sýmen qamtylýyna múmkindik beredi. Bul sý tasıtyn kólikterdiń kómegimen sýarǵannan góri áldeqaıda tıimdi tásil.
Izraıldik ádiske baǵyttalǵan tehnologııalar aǵashtardyń tamyryna kún saıyn 100 tekshe metrden astam sý sińire alady. Aqtóbe qalasynda aldaǵy ýaqytta osy tamshylatyp sýarý ádisine arqa súıeıtin segiz jobany iske asyrý kózdelgen. Onyń tolyqtaı júzege asýy jańa sýarý tásiliniń alǵashqy nátıjelerine baılanysty bolmaq.
Osy rette Aqtóbe qalasynda oryn alyp júrgen keıbir keleńsizdikterdi aıta ketýdiń de oraıy kelip turǵandaı. Máselen, kúz ben kóktem aılarynda ókiletti uıymdar tarapynan pálenbaı myń túp tal-terek egildi degen aqparat pen raporttar beriledi. Alaıda jas óskinderdiń ósýine tıisti kútim jasalmaı, keıin qýrap qalady. Mundaı qur dabyra jaǵdaıynda Aqtóbede jasyl jelektiń jaıqalyp óse qoıýy ekitalaı. Aǵashtardy ekkennen keıin ony der kezinde sýarý men kútip-baptaý kerek. Qala turǵyndarynyń jappaı tal-terek ósirý mádenıetin boılaryna sińire almaı júrgeni de qynjyltpaı qoımaıdy.
AQTО́BE
