Elordadaǵy «Folıant» baspasynan jaryq kórgen «Shyǵarmashylyq shyraǵym – baq juldyzym» atty avtordyń súbeli eńbegi jýrnalıstik ǵumyrdyń jyly estelikterimen órilgen ómirbaıandyq joldy hám qoǵamdaǵy kúrdeli máselelerge beıjaı qaramaıtyn qaıratkerlik bolmysty jan-jaqty asha túsýimen erekshelenedi.
Jańa jınaqta avtordyń týyp-ósken jeri – Aqsýat óńirindegi balalyq shaǵynan bastap, jastyq jigeri jalyndaǵan jyldardaǵy alǵashqy eńbek joly men qazaq jýrnalıstıkasy aǵa býynynyń qamqorlyǵy jáne ortasynan ozyp shyǵyp, baspasóz ben qoǵam isinde qazaqtyń qaıratker qyzyna aınalǵan dúbirge toly ýaqyttyń, jemisi máýeli jyldardyń jarqyn úni bar. Sonymen birge avtordyń jetpistiń bel ortasyna jetken bıiginen qaraǵandaǵy ómirdiń óz órimderi ájelik parasatpen ushtasa áli de qalamyn qolynan tastamaǵan qajyrlylyǵyn kórsetedi. Mine, bul – mamandyqqa degen shynaıy ińkárlik!
«Baıqasańyz, bir emes, birneshe adamnyń enshisine buıyratyndaı-aq is-áreket, ataq, abyroı. Tynymsyz eńbektiń nátıjesinde jetse kerek munyń bárine. Jýrnalıstik, ustazdyq izdenisiniń negizinde qandaı máseleni qaýzasa da búge-shigesine deıin naqty taldaıtyn óresi tańǵaldyrady» dep jazady kitaptyń alǵysózinde Qazaqstannyń eńbek sińirgen qaıratkeri, halyqaralyq «Alash» syılyǵynyń ıegeri Maǵıra Qojahmetova. Shyn máninde, Saırash Ábishqyzy kitabynyń kógildir muqabasynda kórsetilgendeı, jýrnalıstik eńbek jolyn aǵa basylym – «Sosıalıstik Qazaqstannan» bastap, Uzaq Baǵaev, keıin Sapar Baıjanov jetekshilik etken redaksııadaǵy kil júırikterdiń arasynan sýyrylyp shyǵyp, «Qazaqstan áıelderi» jýrnalynda uıymdastyrýshylyq qabiletin ushtap, sol kezdegi respýblıkadaǵy jalǵyz-jarym pedagogıkalyq basylymdar sanatyndaǵy «Qazaqstan mektebi» men «Bastaýysh mektep» jýrnaldarynyń basshylyǵyna jan-jaqty daıyndyqpen kelgen-di. Mine, HH ǵasyr basynda Ahmet Baıtursynuly men Smaǵul Sádýaqasuly syndy birtýar arystar qalaǵan jýrnaldyń elýinshi jyldardan bastap keńestik ıdeologııa qyspaǵymen taryla túsken órisin keńeıtýge bilek sybana kirisken Saırash Ábishqyzy 30 jylǵa jýyq bas redaktorlyq qyzmetinde «Qazaqstan mektebi» jýrnalynyń janynan «Otbasy jáne balabaqsha», «Informatıka, fızıka, matematıka», «Qazaq tarıhy», «Bıologııa, geografııa jáne hımııa» sııaqty kóptegen pánderge arnalǵan jýrnaldardy ashyp, ulttyq mektepterdiń artýyna ǵana emes, ondaǵy bilim sapasynyń joǵarylaýyna da jýrnaldaǵy qyzmetinen bólek, Almaty qalasy máslıhatynyń depýtaty jáne «Qazaq tili» qoǵamynyń Almaty qalalyq fılıalynyń jetekshisi retinde de aıtarlyqtaı úles qosty. Sonymen birge redaksııa músheleriniń áleýmettik jaǵdaılarynyń oń sheshilýine qolushyn sozyp, búginde ádebıet pen mádenıettiń beldi ókilderine aınalǵan jýrnalıster qaýymynyń baspanaly bolýyna yqpal etti. Bul jergilikti ulttyń tirkeýsiz qalada turaqtaı almaıtyn, Almatyda alshań basyp júre almaıtyn keńestik kezeń men toqsanynshy jyldardyń toqyraýynda meıirimdilik pen menedjerlik úılesiminiń úzdik úlgisi ispetti edi. Jınaqta qaıratker-qalamgerdiń bul qyry da jyly esteliktermen, júrekten shyqqan jyrlarmen órilgenin aıta ketken lázim.
Saırash apaı búginge deıin bilim salasyndaǵy, ulttyq tálim-tárbıe isindegi kókiregin qozǵaǵan kórkem oılaryn oqyrmanymen bólisip keledi.
Jınaqty qolǵa alǵanyńyzda Qazaqstannyń eńbek sińirgen qaıratkeri, «Qurmet» ordeniniń ıegeri, Bilim berý isiniń qurmetti qyzmetkeri Saırash Ábishqyzynyń bolashaq urpaqtyń biregeı bolýyna arnaǵan shyǵarmashylyq ǵumyry shynynda bir adamǵa jeterlik baq juldyzy ekenin túısine túsesiz.
