Kóp jyldar memlekettik qyzmette júrip, jaqynda ǵana zeınetkerlikke shyqqan aǵamyzǵa tańyrqaı qarap, birden oıymdaǵy saýaldy jetkizdim.
– Bóke, kúndiz-túni bitpeıtin jumysta júrip, aýlańyzdy jasyl jelekke qalaı malyndyryp qoıǵansyz?
Aǵamyz ádemi bir jymıyp alyp, áńgime tıegin aǵytty. «Ras aıtasyń. Qarbalas qaýyrt jumystan qolymyz tımeıtini shyndyq. Sol úshin de ádeıilep kóktem shyǵa salysymen ózimniń eńbek demalysymdy alatyn edim. Osy ýaqytta myna jerge baqsha daqyldaryn egip, jańa jemis túrleriniń kóshetterin de otyrǵyzamyn. Jyl saıyn baqshaǵa qyzanaq, qııar, qyzylsha, sábiz, jýa tuqymdaryn sebemin, kúz bolǵanda bala-shaǵa rahatyn kóredi. Bul birinshiden otbasymdy tabıǵı ónimmen qamtamasyz etse, ekinshiden nemerelerim eńbektiń nany tátti ekenin kózben kórip júr», deıdi Bókeń aǵynan jarylyp.
Eńbek dese janyp túsetin azamattyń aýlasynda búginde 400 túp tal, 100-ge jýyq jemis aǵashtary jaıqalyp ósip tur. Olardyń qatarynda sary órik, shıe, alma, almurt, júzim, grek jańǵaǵy, kıvı, injir, aıba, shabdaly, qaraqat bar. Barlyǵy da kóktep, jemis bergen.
Sanaly azamattyń ómirde aldyna qoıar maqsaty – úı salyp, aǵash otyrǵyzyp, urpaq ósirip, olardy durys tárbıeleý bolsa, Bókeń de osy úsh mindetin tolyq oryndaǵan. Ol 5 bala tárbıelep, qazir 5 nemeresiniń qyzyǵyn kórip otyr. Ámanda ıgi bastamanyń basy-qasynda júretin Bókeńniń shańyraǵy jyl saıyn baý-baqsha egýdi ıgi dástúrge aınaldyryp, jalyqpaı eńbek etýdiń nátıjesinde aýlasyn baý-baqshamen jaınatyp otyrǵan úlgili otbasylardyń biri.
Jeńisbek AIYMQULOV
Qyzylorda oblysy,
Qazaly aýdany
