«Úkimettiń sheshimimen Eńbek jáne halyqty áleýmettik qorǵaý mınıstrligi eldegi jumyssyzdyqty jyl saıyn 0,1 paıyzǵa azaıtyp otyrýy tıis. Bul úshin respýblıka boıynsha jyl saıyn keminde jańadan 370 myń jumys orny ashylýy kerek. Bıylǵy jartyjyldyqta 186 myń jańa jumys orny ashylǵan. Bul byltyrǵy alǵashqy alty aımen salystyrǵanda 7 paıyzǵa artyq», dedi Eńbek jáne halyqty áleýmettik qorǵaý birinshi vıse-mınıstri Erjan Jylqybaev. Mınıstrdiń birinshi orynbasarynyń aıtýynsha, jyl basynan beri saýda salasynda 24 myń, qurylysta 18 myń jáne aýyl sharýashylyǵynda 17 myń jańa jumys orny ashyldy. Bul – jańa jumys oryndary eń kóp ashylyp jatqan salalar. О́ńirlerge toqtalar bolsaq, Almaty qalasy men Mańǵystaý jáne Almaty oblystarynda jańadan jumys oryndary kóptep ashylyp jatyr.
Mınıstrliktiń málimetinshe, jumyspen qamtý jáne halyqty jappaı kásipkerlikke tartýdyń eń tıimdi quraldarynyń biri – «Eńbek» memlekettik baǵdarlamasy. «Baǵdarlama ashylǵaly beri bıýdjetten 194 mlrd teńge bólinip, bul óz kezeginde 1 mln 200 myń adamnyń «eki qolǵa bir kúrek» tabýyna múmkindik bergen. Al bıyl osy baǵdarlamaǵa 124 mlrd teńge bólinip, 700 myń azamatqa jańa jumys oryndary ashylmaq. Byltyr baǵdarlama boıynsha 600 myń adam jumysqa ornalasqan edi», dedi ol.
E.Jylqybaevtyń aıtýynsha, baǵdarlama negizinen tórt baǵytta jumys isteıdi. «Birinshi baǵyt – qysqamerzimdi kásiptik oqytý. 1 shildedegi jaǵdaı boıynsha 22 myń azamat oqytylyp, búginde onyń 3 myńy oqýyn aıaqtap, jumysqa ornalasty», dedi ol.
«1 qyrkúıekten bastap tegin tehnıkalyq jáne kásiptik oqýǵa 23 myń azamat jiberiledi. Olardyń stıpendııasy 30 paıyzǵa kóbeıip, 21 800 teńge boldy. Atalǵan baǵdarlama boıynsha oqytýshylar men bilim berý mekemeleri tómendegi talaptarǵa saı bolýy tıis: Oqýdy aıaqtaýshylardyń keminde 60 paıyzy jumysqa ornalasýy; qysqamerzimdi oqytý tájirıbesi 1 jyldan kem bolmaýy; óndiristegi tájirıbesi 1 jyldan kem bolmaýy jáne oqytý mekemeleriniń tehnıkalyq bazasy qazirgi zamanǵa saı bolýy qajet», dedi mınıstrlik ókili. Birinshi vıse-mınıstrdiń aıtýynsha, osyndaı talaptarǵa saı keletin qazir 615 myń bilim berý mekemeleri bar.
«Ekinshi baǵyt – jappaı kásipkerlikti damytý. Bul baǵyt boıynsha 84 mlrd teńge qarajat qaralyp otyr. Oǵan 19 myń azamat iligedi». Baǵdarlama boıynsha 4 myńdaı shaǵyn nesıe berilgen. Ony alǵandardyń 3200-i aýyl azamattary bolsa, qalǵan 800-i – qala turǵyndary. Sonyń ishinde startap jobalarǵa 2100 shaǵyn nesıe berilse, jeke isti keńeıtýge 1402 shaǵyn nesıe berilgen. Shaǵyn nesıe alýshylardyń arasynda áıelderdiń úlesi artyp kele jatyr. Kórsetkish byltyrǵydan 33 paıyzǵa artyp, 2000 myńǵa jetti. Bıyl shaǵyn nesıe alǵan kásipkerlerdiń ózi 5 myńdaı jańa jumys ornyn ashty», dedi birinshi vıse-mınıstr.
Úshinshi baǵyt – jumys kúshi artyq óńirlerdegi azamattardy jumysshy tapshy óńirlerge kóshirý. Bul baǵyt boıynsha 4 myń azamat ońtústikten soltústikke kóshti. «Jyl sońyna deıin biz 10 myń azamatty kóshirýimiz kerek», dedi ol. E.Jylqybaevtyń aıtýynsha, Úkimet qonys aýdarýshylardyń otbasyndaǵy árbir azamatqa 88 myń teńgeden sýbsıdııa bóledi. Sonymen qatar bir jyl boıy úı jaldaýǵa jáne kommýnaldy qyzmet tólemderi óteledi.
Sonymen qatar mınıstrlik elde suranysqa ıe mamandyqtardy kóptep daıarlaý máselesin qozǵady. Birinshi vıse-mınıstrdiń aıtýynsha, qazirgi tańda elde 3D modeldeý ınjeneri, IT mamandary, sáýletshi, dızaıner men týrızm salasynyń mamandary tapshy eken. Budan bólek, naqty ǵylymdardyń oqytýshy-pedagogtary men elektrdánekerleýshiler men gazdánekerleýshilerge suranys joǵary ekeni aıtyldy.
