Indýstrııa jáne ınfraqurylymdyq damý mınıstrligi Indýstrııalyq damý jáne ónerkásiptik qaýipsizdik komıtetiniń tóraǵasy Qanat Baıtov ishki jalpy ónimniń shamamen 6,7%-y taý-ken metallýrgııa keshenine tıesili ekenin, sondaı-aq ónerkásiptik óndiristiń 25%-yn, eksporttyń 24%-yn osy sala alyp jatqanyn aıtty. Búginde saladaǵy kásiporyndardyń sany 800-den asyp, 185 myń adam jumyspen qamtylǵan. Komıtet tóraǵasy sońǵy 10 jylda ındýstrııalandyrý baǵdarlamasy arqyly taý-ken metallýrgııa kesheninde 114 joba iske qosylǵanyn jetkizdi.
– 2015-2019 jyldar aralyǵynda elimizde tórtinshi ónerkásiptik revolıýsııa talaptaryna saı keletin jańa qondyrǵylarmen jaraqtalǵan zamanaýı taý-ken metallýrgııa keshenderi iske qosyldy. Jýyrda ǵana YDD ferroqorytpasyn óndiretin avtomattandyrylǵan zaýyt jumys isteı bastady. Onyń óndiristik qýaty jylyna 180 myń tonna. 2021 jylǵa qaraı bul kólemdi 240 myńǵa ulǵaıtý josparlanǵan. Ereksheligi sol, óndiriste jańa tehnologııalar qoldanylady. Atap aıtqanda, kómirdiń ornyn elektr energııasy almastyrǵan. Bul atmosferaǵa taraıtyn zııandy qaldyqtardy azaıtýǵa septesip otyr, – dedi Qanat Baıtov.
Mekeme ókili 2025 jylǵa deıin ken óndirý jáne óńdeý ónerkásibin sıfrlandyrý sheńberinde 1,7 trln teńge somasyna 192 jobany júzege asyrý josparlanǵanynan habardar etti. Onyń ekonomıkalyq paıdasy 2, 2 trln teńgeni quraıdy dep kútilýde.
Al «Qazmyrysh» kásiporyny sıfrlandyrýdyń tıimdiligin arttyrý úshin arnaıy jol kartasyn ázirlep, oǵan 7 joba engizdi. Shyǵystaǵy alpaýyt kompanııa ásirese jasandy ıntellektige erekshe den qoımaq. Osy arqyly eńbek ónimdiligin ulǵaıtyp, jańa mamandardyń býynyn qalyptastyrý maqsaty qoıylǵan.
– Big data – ıaǵnı úlken derekti basqarýdy engizý qarqyn alyp, negizgi kezeńge keldi. Bul joba óndiristi ilgeriletýmen qatar, ekonomıkalyq modelge oń áser berýi tıis. Eń bastysy, barlyq sharýany bir ortalyqtan basqaryp, sheshýge kómektesetinine senimdimiz. Taǵy bir aýqymdy ınnovasııalyq jobamyz – ózin-ózi oqytý júıesine negizdelgen jasandy ıntellektimen baılanysty zaýyttyń iske qosylýy. Indýstrııa 4.0-di negizge alsaq, oıymyzǵa birden kıberfızıkalyq júıeler oralady. Qarapaıym tilmen aıtqanda, jańa tehnologııalar operatorǵa úlken kólemdegi derekterdi ıgerýge yqpal etýge tıis, – deıdi «Qazsınk» JShS bas dırektorynyń sıfrly transformasııa boıynsha keńesshisi Maksım Gaıfýlın.
Degenmen bul salada da sheshilmegen máseleler bar deıdi spıkerler. Bul birinshi kezekte bilikti mamandardyń tapshylyǵyna qatysty. Qazir eldegi aýyr óndiris oryndarynda salany jetik biletin IT-mamandar tapshy.
